Səhiyyə

Qəbələdə yanğında xəsarət alan ərəblər Bakıya gətirildi

9 Oktyabr 2018 11:12

Qəbələ rayonunda kirayə yaşadıqları evdə baş verən yanğın zamanı xəsarət alan ərəblərdən ikisi Bakıda Respublika Yanıq Mərkəzinə yerləşdirilib.

Bu barədə Publika.az-a Qəbələ Rayon Mərkəzi Xəstəxanasından məlumat verilib.

Məlumatda bildirilib ki, 1993-cü il təvəllüdlü Əlhəmidi Əhməd Adnan oğlu və 1989-cu il təvəllüdlü Əlhəmidi Nura Adnan qızı vəziyyətləri ağır olduğu üçün Bakıya göndərilib. Onlara bədənin üçüncü dərəcəli yanıq diaqnozu qoyulub.

Xəstəxanadan bildirilib ki, yanğın nəticəsində xəsarət alan digər 4 nəfərin vəziyyəti yaxşı olduğuna görə evə buraxılıb. Onlar da bu günlərdə Bakıya gələcəklər.

Qeyd edək ki, oktyabrın 8-də səhər saatlarında Qəbələ rayonunun mərkəzində yerləşən fərdi evlərdən birində yanğın baş verib. Hadisə nəticəsində turistlər - bir ailənin 6 üzvü xəsarət alıb, 1 nəfər isə dünyasını dəyişib.

Gülxar