Trampın "Zəngəzur dəhlizi" planı: ABŞ səfiri ilə Qriqoryan nəyi müzakirə ediblər?

Zəngəzur dəhlizinin Ermənistan hissəsinin tikintisi ilə bağlı qərar gələn həftə verilə bilər.

Publika.az xəbər verir ki, Ermənistan mediası gələn həftə ABŞ-dan nümayəndə heyətinin gələcəyi haqda yazmışdı.

“Joxovurd” qəzetinin məlumatına görə, ABŞ-ın müxtəlif dairələrindən təmsilçilərin yer alacağı nümayəndə heyəti Ermənistanda “Tramp marşrutu”nu (Zəngəzur dəhlizi) müzakirə edəcək.

“Müzakirələr təkcə dəhlizin siyasi detallarını deyil, tikinti işlərinin texniki tərəfləri ətrafında da aparılacaq. Məqsəd Tramp-Əliyev-Paşinyan razılaşmasının praktiki icrasının ardıcıllığına aydınlıq gətirməkdir. Müzakirələr qapalı şəkildə keçiriləcək. Rəsmi dairələr bu haqda məlumat vermir”, - qəzet yazıb.

Bu məlumat Ermənistan hökuməti tərəfindən təsdiq olunmasa da, dünən ABŞ-ın İrəvandakı səfiri Kristina Kvienin Paşinyanın müavini Mher Qriqoryanla görüşməsi diqqət çəkib. Rəsmi məlumata görə, görüşdə Vaşinqton razılaşmaları və regionda kommunikasiyaların blokdan çıxarılmasına dair fikir mübadiləsi aparılıb. Bu o deməkdir ki, amerikalı səfirlə Paşinyanın müavini Zəngəzur dəhlizinin icrasını müzakirə ediblər. Növbəti həftə ABŞ nümayəndə heyətinin Ermənistana səfəri haqda yayılan məlumat fonunda da bu görüş təsadüfi deyil. Görünür, Tramp Administrasiyası Zəngəzur dəhlizinin tezliklə həyata keçirilməsini istəyir.

Asif