Gənc yazardan homoseksuallara dəstək - FOTO

Gənc yazar, “Qızıl qələm” media mükafatı laureatı Orxan Bahadırsoy “Günahdır səni sevmək” adlı yeni kitabının təqdimatını və imza gününü keçirib.

Publika.az-ın məlumatına görə, 2012-ci ildə “Fahişə mələklər” romanından sonra müəllifin sayca ikinci kitabı olan “Günahdır səni sevmək” romanı yasaq bir məhəbbət hekayəsindən bəhs edir. Roman düşüncəsi, rəftarı, bilik və bacarıqları, istedadı ilə ətrafındakılardan fərqlənən İlyas və Mövlanın sevgisindən bəhs edir.

Eynicinsli münasibətlərin günah, yasaq, əxlaqa və dəyərlərə zidd hesab olunduğu bir cəmiyyətdə bir-biri ilə aşkar eşq yaşayan iki gəncin sevgisi romanın əsas süjet xəttidir. Lakin burada qəhrəmanların cəmiyyətdəki cinsi azadlıq uğrunda mübarizəyə qoşulması, bu eşq-məhəbbət və mübarizə fonunda ölkədəki transseksualların, geylərin də həyatı və aqibəti yer alır.

Qeyd edək ki, ilin sonlarına doğru müəllif “Fahişə mələklər” romanının ikinci nəşri və “Xəstə məhəbbət və ya ölümcül seks” romanı ilə oxucularını sevindirəcək.

Cəvahir Səlimqızı