• USD 1,7369 +0,17% EUR 1,8625 -0,14%
    • GBP 2,1995 -0,47% RUB 0,0272 +0,37%

MSK Müsavat Partiyası ilə bağlı bəyanat yaydı

  • Nida.az
  • 29 Oktyabr 2015 19:56
  • 470 Baxış
MSK Müsavat Partiyası ilə bağlı bəyanat yaydı

Mərkəzi Seçki Komissiyası (MSK) 2015-ci il noyabrın 1-nə təyin edilmiş Azərbaycan Milli Məclisinə seçkilərdə Müsavat Partiyasının və "Nida" vətəndaş hərəkatının iştirakdan imtina etməsi ilə əlaqədar bəyanat yayıb.

MSK-dan Publika.az-a verilən məlumata görə, 2015-ci il noyabrın 1-də Milli Məclisə keçiriləcək seçkilərdə Müsavat Partiyası öz iştirakının dayandırılması və pariyanın qeydə alınmış namizədlərinin geri çağrılmasının həmin namizədlərin mülahizəsinə verilməsi barədə qərar qəbul edib.

Komissiya bildirir ki, Azərbaycan Seçki Məcəlləsinin 154.1-ci maddəsinə əsasən siyasi partiya öz nizamnaməsinə uyğun olaraq, siyasi partiyaların bloku isə ona daxil olan siyasi partiyaların səlahiyyətli nümayəndələrinin qərarı ilə səsvermə gününə ən geci 10 gün qalanadək istənilən vaxt müvafiq dairə seçki komissiyasına yazılı ərizə verərək, birmandatlı seçki dairəsi üzrə irəli sürülmüş namizədi, qeydə alınmış namizədi geri çağırmaq hüququna malikdir.

Seçki Məcəlləsinin 99.4-cü maddəsinə əsasən isə seçki bülletenləri Mərkəzi Seçki Komissiyasının qərarı ilə onun nümayəndələrinin müşahidəsi altında poliqrafiya müəssisələrində səsvermə gününə ən azı 10 gün qalmış hazırlanır.

Bəyanatda qeyd olunur ki, Müsavat Partiyasının bu barədə qərarının məhz cari ilin noyabrın 1-də Milli Məclisə keçiriləcək seçkilərə 10 gündən az müddət qalmış vaxtda qəbul edilməsi Seçki Məcəlləsinin tələblərinin pozulması ilə yanaşı, həmçinin keçiriləcək seçkilərə şüurlu olaraq əngəllər törətmək kimi qiymətləndirilir: "Səsvermə prosesində seçicilərin çaşdırılmasına xidmət edən bu addım seçki subyekti olmayan, seçki prosesində ümumiyyətlə iştirak etməyən və namizəd qeydə aldırmaq hüququna malik olmayan "Nida" vətəndaş hərəkatının belə bəyanat verməsi ilə daha da qabarıq ortaya çıxıb.

Təəssüflər olsun ki, seçki təcrübəsinə mənfi təsirsiz ötüşməyən belə neqativ addımlar onlar tərəfindən davamlı olaraq atılmaqdadır. Belə ki, Azərbaycan Milli Məclisinə keçiriləcək seçkilərin təxirə salınaraq 4 ay sonraya təyin olunması da Müsavat Partiyası tərəfindən irəli sürülüb. Halbuki, bu təklifi irəli sürənlər bilməlidirlər ki, Azərbaycan Respublikasının Konstitusiyasının 84-cü maddəsinin ll hissəsinə uyğun olaraq, Milli Məclisin hər çağırışının seçkiləri hər beş ildən bir noyabr ayının birinci bazar günü keçirilir və onun iddia edilən müddətə və əsaslarla təxirə salınması qaydası seçki qanunvericiliyində ümumiyyətlə nəzərdə tutulmayıb".

Bəyanatda deyilir ki, bütün bu hərəkətlər onu sübut edir ki, Azərbaycan Milli Məclisinə seçkilərin qanunun tələblərinə uyğun olaraq keçirilməsi Müsavat Partiyasının və "Nida" vətəndaş hərəkatının maraqlarına cavab vermir.

Xəbər lenti

DAHA ÇOX XƏBƏR