Nida.az
Adil Qeybulla: “Ağzından süd iyi gələnlər öyüd-nəsihət verir” – Müsahibə
Müsavat Divanının keçmiş üzvü, professor Adil Qeybulla Pubika.az-a müsahibəsində partiyada yaranmış durumu şərh edib.
- Adil bəy, Müsavatda qarşıdurma genişləndikcə tərəflər
bir-birinə qarşı təhqirlərdən belə çəkinmirlər. Xüsusilə,
narazılara qarşı sosial şəbəkələrdə xüsusi kampaniya aparır. Bu,
nədən irəli gəlir?
- Ümumiyyətlə, bizim mentaliteti nəzərə alsaq, həmişə mübahisələrə,
bir-birimiz haqqında alt qatdakı fikirləri üzə çıxarmağa
meyilliyik. Bu, belə situasiyalarda daha tez ortaya çıxır. 20 ildən
çox bir yerdə yol gedən insanların bir-birinə bu dərəcədə
münasibəti ürək ağrıdan məsələdir.
Digər tərəfdən, partiyaya yeni qoşulmuş, ağzından süd iyi gələn
bəziləri ona-buna öyüd-nəsihət verirlər. Partiyanın rəhbərliyində
oturan adamlar bu işə son qoymalıdır. Hər halda bu adamlar elə belə
danışmırlar. Onun, bunun adını çəkir, təhqirlər edirlər. Bunlar
cəzasızlıq mühitindən irəli gəlir.
Ortada bir tərbiyə olmalıdır. Bu gün Hikmət Hacızadə, Qubad
İbadoğlu və digərlərinin ünvanına bu cür ittihamların deyilməsi
etikadan uzaq olduqlarını göstərir. Heç kim bu situasiyada qalib
olduğunu düşünməsin. Heç kim özünü böyük siyasət ustası hesab
edərək bu prosesləri idarə etdiyini ağlına belə gətirməsin. Öz
məsuliyyətimizi dərk etməliyik, arxaya baxaraq, getdiyimiz yolu
dəyərləndirməliyik. Heç olmasa, öz gələcək statusumuzu
düşünməliyik. Bəzi adamlar düşünmədən danışırlar. Onlar heç nədən
20 illik münasibəti yerə vurmağa hazır olanladır. Mən əvvəldən
neytral olmuşam. İlk vaxtlar barışdırıcı mövqedə dayanmışam.
- Amma sosial şəbəkələrdə sizin də ünvanınıza ittihamlar,
təhqirlər yağır.
- Bundan xəbərim var. Mən “facebook”dan çox istifadə etmirəm, amma
mənə çatdırırlar. Bir qız var, nə üzdən tanıyıram, nə də adını
bilirəm. “Facebook”da yazıb ki, guya xəstəxanaya gəlib, mən ondan
əməliyyat üçün nə qədərsə pul istəmişəm. Halbuki, mən dövlət
xəstəxanasında işlədiyim vaxtla minlərlə müsavatçını pulsuz
əməliyyat etmişəm. Bu gün rəhbərlikdə oturub bizim ünvanımıza
sifarişli təhqirlər yazdıranların ailə üzvlərini nə qədər kömək
etmişəm. Onlar hansı vicdanla belə şeylər yazdırırlar?! Bu adamlar
hər cür iftira atmağa hazırdırlar. Kənardan bəzilərinin qardaşları
Müsavatda mənəviyyat simvolu hesab edilən şəxslərdən yazırlar. Axı
mənəviyyat simvolu olanlara hansı hörmət qoyuldu? Ünvanımıza bu
qədər təhqir olan vaxt nə etməliyik? Mən onların səviyyəsinə düşüb
cavab vermək istəmirəm. Amma bu, olduqca ürək ağrıdan
mənzərədir.
- Sizcə, yeni rəhbərlik vəziyyəti düzəltmək üçün nəsə edə
bilərmi?
- Ağıllı başqan olsaydı, bu konflikt çoxdan həll olunmuşdu. Amma bu
gün partiyanın bütün strukturlarını zəbt ediblər. Divanı, Məclisi
öz istədikləri kimi qurublar. Sonra da gəlin barışaq deyirlər.
Qurultayda partiya iki yerə bölünüb. Bir hissəsi rəhbərlikdə təmsil
olunursa, digər hissəsinin haqları niyə tanımır? Kifayət qədər
sanballı olan bu adamlar harada təmsil olunmalıdır? Belə vəziyyətdə
necə qucaqlaşmaq olar?
- Yeni rəhbərlik nə üçün baş verənlərin qarşısını almaq
istəmir?
- Bəzi insanların şəxsiyyət kimi konturları çətin situasiyalarda
daha aydın görünür. Vaxtilə ideallaşdırılan, zirvələrə qaldırılan
insanların sonradan cılız hisslərlə yaşadığı ortaya çıxır. Buna çox
təəssüf edirik. Cəmiyyət Müsavatın düşdüyü durumu, üzvlərini
qovmasını, bir qrupun partiyasına çevrildiyini görür. Belə olanda
Müsavat Rəsulzadənin partiyası olmaq hüququnu itirmiş olur. Bununla
yanaşı, Azərbaycanda heç bir siyasi təşkilat, o cümlədən Müsavat
müsavatçılıq haqqını inhisara ala bilməz. Bu millətə aid olan
ideologiyadır. Müsavatçılıq yolunda Müsavat Partiyasının
üzvlərindən kifayət qədər fədakarlıq edən həm fərdlər, həm
təşkilatlar var. Məsələn akademiyanın cümhuriyyət şöbəsi
müsavatçılıqla bağlı kifayət qədər tədqiqatlar aparıb. Təkcə
Şirməmməd Hüseynov bir partiyadan artıq iş görüb. Cəmiyyətdə hər
kəsin, hər qurumun öz yeri var. Hər birini dəyərləndirməyi
bacarmalıyıq. Yoxsa, “103 illik partiyayam, mənə heç kim heç nə edə
bilməz” demək olmaz. Partiyadan bu qədər adam ayrılır, amma heç
kimin vecinə deyil. Sanki kənar bir əl var və bu əl fikir
plüralizminin əleyhinə çıxaraq, yad fikirlilərin uzaqlaşmasını,
partiyanın xırda quruma çevrilməsini ssenariləşdirir. “Əsas odur
Müsavat möhürü olsun” deyə düşünürlər. Amma partiyanı belə idarə
etmək olmaz. Bu böyük mənəvi cinayətdir. Bu cür davam edəcəksə,
Müsavat Partiyası Rəsulzadənin adını daşımağa mənəvi hüququnu
itirmiş olacaq.
- Sizcə, ortaq yol tapmaq mümkün olacaqmı?
- Başqa yol yoxdur. Ambisiyalar bir kənara qoyularaq konsolidasiya
yolu tapılmalıdır. Əgər buna gediləcəksə, bu situasiyadan xilas
olacağıq. Destruktiv yol tutmaq hansısa formada müvəqqəti qələbə
eyforiyası yarada bilər, amma bunun altında böyük fəlakət
gizlənir.
- Növbədənkənar qurultayın olması tələbələri səslənir.
Sizcə, bu mümkün ola bilərmi?
- Niyə də mümkün olmasın? Bu alternativ variantlardan biridir.
Hər-halda konsensus tapılmalıdır. Yoxsa, mən idarədə oturmuşam,
gəlin görüşək deməklə bitmir. Görüşsək belə, nədən danışacağıq?
Partiyanın bütün strukturları formalaşıb. Divana, Məclisə baxın.
Görün nə gündədir. Belə olanda hansı danışıqdan söhbət gedə bilər.
Ona görə də hansısa konsensusdan danışırqsa, mütləq ictimaiyyətin
gözü önündə olmalıdır. Partiya olaraq bu missiyanı üzərimizə
götürmüşüksə, cəmiyyət qarşısında məsuliyyət daşıyırıq. Dialoq,
yaxud hansısa müzakirə cəmiyyətdən qətiyyən gizlədilməməlidir.
- Adil bəy, yeni rəhbərlikdə təmsil olunanlar narazıları
iqtidara işləməkdə ittiham edirlər. Bu haqda Divanın bəyanatında
da, Arif Hacılının açıqlamasında da deyilir.
- Bu gün iqtidarın Müsavatın işinə qarışması marağı yoxdur. Ortada
sadə bir məntiq var. Əgər bir partiya normal mitinq keçirdə,
cəmiyyətdəki proseslərə təsir edə bilmirsə, iqtidarın o təşkilatla
hansı dialoqu ola bilər, yaxud təşkilat daxilində hansı prosesin
baş verməsində maraqlı olar?
İqtidarı bir kənara qoyub situasiyaya baxaq. Qurultay nəticələri partiyada iki böyük fraksiyanın olduğunu göstərdi. Bir fraksiya bütün rəhbər strukturları tutublar, ikinci fraksiya isə kənarda qalıb. Burda iqtidarın nə günahı var? Sadəcə olaraq, bu cür ittihamlar Azərbaycan Xalq Cəbhəsi yaranan gündən onun genotipinə atılan xəstə virusdur. O vaxtdan hər kəs bir-birini satqınçılıqda ittiham edirdi. Filankəs dünən “Avrora” çəkirdi, bu gün “Marlbro” çəkir, deməli nəsə var. Bu cür cılız ittihamlar onların genotipindədir. Bundan təmizlənmək mümkün deyil. Heç nəyə nail ola bilməyənlər digərlərinə daim irad tutur, mənasız fikirlər səsləndirirlər. Misal üçün, mən nazir işləməmişəm, həkiməm. Həbsxanada oturanda da öz ailəmi dolandırmışam. Sənətimi mənim əlimdən kim ala bilər? Vurğun Əyyubu işləməkdə ittiham edirlər. Adam Qarsda işləyib, yaxud başqa yerdə. Onu iqtidarla separat danışıqlarda ittiham etmək ən azı ləyaqətsizlikdir. Ümumiyyətlə iqtidarla əməkdaşlıq ittihamları siyasi demaqogiyadan başqa bir şey deyil. Məsələni həll etmək əvəzinə insanlara yarlıqlar yapışdıraraq məsuliyyətdən yayınmaq istəyirlər. Amma bu mümkün olmayacaq. Çünki bu tarixi məsuliyyətdir. Sabah biz də əlimizə qələm alıb tarix yazmaq gücündəyik.
Asif Nərimanlı
-
Region22:37
Başqa çıxış yolumuz yoxdur - Paşinyan
-
Hadisə21:47
Dörd aylıq körpə binadan necə düşüb? - Hadisə yerindən GÖRÜNTÜLƏR
-
Magazin121:35
Günelə nə olub? - Xəstəxanadan görüntüsünü paylaşdı və... - FOTO
-
Hadisə21:10
Qırmızı işıqda keçən nazirin maşını aşdı - FOTO
-
Magazin120:22
Müğənni Yalının qohumu sevgilisi tərəfindən qətlə yetirildi - FOTO
-
Dünya19:57
Zelenski onu yeni vəzifəyə təyin etdi
-
Magazin119:15
Talıb Talenin toyu olacaq: özündən 15 yaş kiçik xanımla... - VİDEO
-
Nida Xəbər 18:55
Ermənistanla sərhəddə işlərin 35 faizi yerinə yetirildi