• USD 1,7430 +0,35% EUR 1,8487 -1,24%
    • GBP 2,1929 -0,21% RUB 0,0275 +0,36%

Səfirliyimiz erməni icmasının cəhdlərinin qarşısını aldı - Argentinada

  • Nida.az
  • 25 Fevral 2014 13:04
  • 429 Baxış
Səfirliyimiz erməni icmasının cəhdlərinin qarşısını aldı - Argentinada

Erməni icmasının fevralın 24-də Azərbaycanın Argentinadakı Səfirliyi və La Plata Dövlət Universitetinin Beynəlxalq Münasibətlər İnstitutundakı Azərbaycanşünaslıq kafedrasının birgə təşkilatçılığı ilə Xocalı soyqırımının 22-ci ildönümü münasibətilə "Ermənistan-Azərbaycan münaqişəsi və onun nizamlanmasının regiondakı vəziyyətə təsiri" mövzusunda seminarın keçirilməsinə mane olmaq cəhdləri uğursuz olub.

Xarici İşlər Nazirliyinin mətbuat xidmətində verilən i məlumata görə, tədbirin başlanmasından öncə Argentina erməni icmasının nümayəndələri səfirliyin qarşısına toplaşaraq tədbirə gələn şəxslərin binaya girişinə mane olmağa çalışmış, tədbirin iştirakçılarının ünvanına təhqiramiz ifadələr səsləndirmiş, habelə səfirliyin əməkdaşlarına zor tətbiq etməyə cəhd göstərmişlər. Hüquq-mühafizə orqanlarının müdaxiləsi nəticəsində erməni icmasının təxribatının qarşısı alınmışdır. Tədbirə mane olmaq cəhdlərinin faydasızlığını görüncə erməni icmasının nümayəndələri 26 fevral tarixində Azərbaycan səfirliyinin qarşısında növbəti aksiyaya toplaşacaqlarını bəyan edərək səfirliyin qarşısından uzaqlaşmışlar.

Tədbirdə Argentina rəsmi qurumlarının, diplomatik korpusun, akademik çevrələrin, müxtəlif dini və milli icma təşkilatlarının nümayəndələri iştirak edib.Tədbirin əvvəlində Xocalıda baş verənlər barədə məlumat verilib və Xocalı soyqırımı qurbanlarının xatirəsi bir dəqiqəlik sükutla yad edilib.

Sonra La Plata Universitetinin Azərbaycanşünaslıq kafedrası və Azərbaycan Respublikası Gənclər və İdman Nazirliyinin birgə təşkil etdiyi "Mən Azərbaycan haqda nə bilirəm?" inşa müsabiqəsinin qalibləri Rosario Universitetindən Alexandro Cardenas və Kordoba Universitetindən Clara Trillini müvafiq olaraq "Dağlıq Qarabağ məsələsi" və "Ermənistan-Azərbaycan münaqişəsi və BMT" mövzularında hazırladıqları yazılar əsasında çıxış etmişlər. Habelə, hər iki natiq Azərbaycana səfərlərində ölkənin dinamik inkişafının, çoxmədəniyyətliliyinin, ölkədə təhsilə və gənclərin inkişafına verilən dəyərin şahidi olduqlarını və Dağlıq Qarabağın erməni icmasının bu məqamları nəzərə almalarının vacibliyini bildirmişlər.

Azərbaycanşünaslıq kafedrasının əlaqələndiricisi professor Paulo Botta Cənubi Qafqazdakı geosiyasi vəziyyət, Azərbaycan-Gürcüstan-Türkiyəni birləşdirən strateji əhəmiyyətli enerji, infrastruktur və nəqliyyat layihələri, Ermənistanın Azərbaycan ərazilərini işğal etməsi səbəbindən bu layihələrdən kənarda qalmasından danışmışdır. Güc tətbiq etməklə bir dövlət tərəfindən digər dövlətin ərazilərinin işğalının yolverilməz olduğunu vurğulayan natiq, Ermənistanın inkişafı üçün ən optimal yolun Azərbaycan-Gürcüstan-Türkiyə əməkdaşlığına qoşulması olduğunu, bunun üçün ilk öncə Ermənistanın öz hərbi qüvvələrini Azərbaycan ərazilərindən çıxarmalı olduğunu deyib.

Səfir Məmməd Əhmədzadə münaqişənin kökləri, Ermənistanın təcavüzünün nəticələri, beynəlxalq təşkilatlar tərəfindən qəbul edilmiş müvafiq sənədlər, münaqişənin nizamlanmasına dair Azərbaycanın mövqeyi barədə danışmışdır. Azərbaycanın regionun inkişafına verdiyi töhfələr və ölkəmizin təşəbbüskarı olduğu strateji layihələr barədə məlumat verən M.Əhmədzadə habelə, müxtəlif iqtisadi-sosial göstəricilərin qarşılıqlı müqayisəsini verməklə qısa müddət ərzində Azərbaycanla Ermənistan arasında Azərbaycanın xeyrinə formalaşmış böyük fərqi diqqətə çatdırmış, bu fərqin getdikcə daha da dərinləşəcəyini bildirərək, münaqişənin tezliklə nizamlanmasının Ermənistana və ümumilikdə regiona gətirəcəyi faydalardan bəhs edib.

Sonda tədbir iştirakçılarına Xocalı soyqırımı və Ermənistan-Azərbaycan münaqişəsi ilə bağlı xüsusi hazırlanmış materiallar paylanıb.

Xəbər lenti

DAHA ÇOX XƏBƏR