Tabloid.az
Deputatlarımız teatra niyə getmirlər? – Sorğu
Azərbaycan Akademik Milli Dram Teatrının aktyoru Əli Nur Kult.az-a verdiyi müsahibədə Millət vəkillərinin, məmurların teatra gəlmədiyini vurğulamış, tamaşalarda millət vəkillərindən yalnız Ziyafət Əsgərovu gördüyünü demişdi. Bu məsələ ilə bağlı bir neçə millət vəkilindən teatra gedib-getmədiyini, getməyənlərdən isə bunun səbəblərini soruşduq.
Fazil
Mustafa: Son vaxtlar teatra getmirəm. Səbəbi odur ki,
“Yuğ” teatrı bağlandı. Mən əsas “Yuğ” teatrına gedirdim. Onların
tamaşaları mənim zövqümə uyğun idi. Bir az açığı sizə deyim ki, ola
bilsin, mənim arzuladığım sənət əsərləri yoxdur, həm də teatr
pafosu çox xoşuma gəlmir. Yəni bir az son vaxtlar janr olaraq da
məni qane etmir. Pafos olan mühitdən qaçmağa çalışıram.
Texnologiyanın inkişafı bizi daha fərqli standarta öyrətdi. Bəlkə
də, ondan qaynaqlanır. Həm də repertuar da qane eləmir. Açığı,
düşünə bilmərəm ki, daha yaxşı repertuar ola. Çünki müasir
texnoloji dövrdə elə belə də olmalıdır. XVII əsrdə, XVIII əsrdə
möhtəşəm tamaşalar qoymaq daha asan idi. İndi bir az çətindir. XX
əsrin əvvəllərində də daha rahat idi. Çünki kino və başqa sənət
nümunələri inkişaf etməmişdi. Daha təbii danışıq üslubu, daha rahat
insanın anlaya biləcəyi davranışlar... Hər halda teatrın böhranının
səbəbi budur. Yəqin ki, indi balet sənət üçün daha uyğundur. Çünki
insanın fiziki hərəkətlərindən müəyyən qədər zövq almaq imkanı var.
Teatrda, bəlkə, bu imkanlar yoxdur deyə, modern dövrdə yaxşı teatr
əsəri yaratmaq da çətinləşib.
Fərəc Quliyev: Yox, son vaxtlar getməmişəm.
Vaxt olmur. Özüm boynuma alıram ki, son vaxtlar getməmişəm. Teatr
hər bir insan üçün, cəmiyyət üçün vacibdir, amma hər halda işlərim
çox olduğu üçün vaxt edib gedə bilmirəm.
Fəzail Ağamalı: Xeyr getməmişəm. Səbəbi odur ki, məni cəlb edə biləcək və məni tamaşanın içərisinə apara biləcək əsərin olmaması və ya olanların qoyula bilməməsidir. Repertuar da, onun təqdim edilməsi də məni qane eləmir.
Aqil
Abbas: Axırıncı dəfə Fuad Poladovun baş rolda oynadığı Əli
Əmirlinin “Şah Qacar” tamaşasına getmişəm. Ondan sonra teatr yay
tətilinə çıxdı, indi sezon yeni başlayıb, hələ getməmişəm. Teatra
tez-tez gedirəm. Rejissorları deyim, Mehriban Ələkbərzadənin də
tamaşasına getmişdim. Ümumiyyətlə, imkan tapdıqca gedirəm. Özü də
gedəndə də qonaq çağırsalar da, bilet alıb gedirəm. Mənim
adətimdir. Dəvətnamə ilə gedirəm, amma gedib kassadan bilet
alıram.
Rasim
Musabəyov: Yox, son vaxtlar getməmişəm. Axırıncı dəfə
“Azdrama”da olmuşdum. Çünki mən teatral deyiləm ki, hər həftə, hər
ay teatra gedəm. İldə bir dəfə, iki dəfə getsəm, böyük
şeydir.
İqbal
Ağazadə: Bəli, gedirəm. Sonuncu dəfə “Azdrama”da “Şah
Qacar” tamaşasında olmuşam.
Asim Mollazadə: Yox, getmirəm.
Musa Qasımlı: Mən teatra gedənəm və hesab
edirəm ki, hər bir şəxsin teatrda olmasının ancaq faydası var.
Ancaq son bir neçə ayda, daha dəqiq, yaydan bəri teatrda olmamışam.
Yayda teatr olmayıb, sentyabrda da iş açılandan sonra baş o qədər
qarışıb ki, vaxt tapıb gedə bilməmişəm.
Zahid
Oruc: Təəssüf ki, xeyr. Mənə elə gəlir ki, Sovet dövründən
kiçik bir zaman keçsə də, belə mədəniyyətə aid olan məsələlərin
paralellərini həmin dövrlə aparırıq. Dərhal da ağıla ilk gələn o
olur ki, indi informasiya axını çoxalıb. O dövrdə belə xatırlayıram
ki, məhdud sayda, beş-altı dövlət qəzetlərindən savayı və məhdud
sayda televiziya kanallarından başqa insanların özünün mədəni
dünyasını, mənəvi ehtiyaclarını, ədəbi düşüncələrini formalaşdırmaq
üçün məkan çox az idi. Məcbur idi ki, bütün bunları müxtəlif
teatrlardan, kino salonlarından və sairədən alsın. Belə demək
mümkünsə, kütləvi baxış məkanlarından keçsin. İndi isə artıq elə
bir informasiya dövrünə gəlib çatmışıq ki, informasiya axınının
çoxluğundan insanlar əziyyət çəkir. İndi emal prosesi zəifləyib.
İnsanlar daha çox quru informasiyanı, xammal informasiyanı alır və
istifadə edir. Yəni onlar yaradıcı təfəkkürə, gözəl bilgilərə,
əhatəli dünya görüşünə sahib olmaq üçün teatrlara getməyə ehtiyac
duymur.
Mən bunun teatra qarşı bir boykot və ya etimadsızlıq kimi qəbul
edilməsini də istəmirəm. Mən orada çalışan insanların daha canlı,
daha yaradıcı bir işlə məşğul olduqlarını, ərsəyə gətirdikləri hər
hansı bir əsərin, tamaşanın üzərində ruhlarını və canlarını
xərclədiklərinin fərqindəyəm. Düşünürəm ki, onlar Şekspirdən bir
səhnəni ifa eləyirlərsə, bir neçə əsr bundan qabağı bu günə
daşıyırlar. Bu, onlardan nə qədər enerji və əziyyət tələb edir.
Əlbəttə, etiraf edirəm ki, quru ekranın, monitorların, androidlərin
və digər planşetlərin verdiyi effektlərlə, yaxud da 3G, 4G
sistemlərinin yaratdığı mənzərə ilə canlı, gözünün qarşısında
gördüyün səhnələr ayrıdır. Bu, doğrudur. Ancaq, bəlkə də, bilmirəm,
siyasi informasiya kütləsi, gündəlik mövzuların bizi bu istiqamətdə
çeşidləməsi daha geniş əhatəyə malik olmaq imkanından məhrum edir.
Bunu birmənalı olaraq vurğulayıb, qeyri-səmimi olaraq iddia eləmək
mümkündür ki, ayda bir dəfə və iki ayda bir dəfə teatra gedibdir.
Amma o qədər statik bir hadisədir ki, o bizim teatra olan
münasibətimizi köklü olaraq izah etməyəcək. Çünki siyasətçilərin və
dövlət adamlarının böyük əksəriyyəti bu gün teatra gedə bilmir.
Məncə, başlıca səbəb informasiya axının çoxalmasıdır. Bəlkə də,
dünyaya açılan insan birdən-birə bu hadisələrin sunamisinə çox
düşübdür. Adamlar bunu beynində tam normal edib sonra da teatra və
ya başqa bu xarakterli ictimai tədbirlərə getməyin zərurətini öz
içlərində hiss etməyə macal tapmırlar. Yəni ehtiyac yoxdur, yox,
bəlkə də, bunun üçün ən sonda zaman və lazım olan o imkanlar
qalmır.
Kamilə
Əliyeva: Düzünü desəm, son vaxtlar gedə bilmirəm. Mən
əvvəllər istər Musiqili Komediya teatrı olsun, istər Akademik Milli
Dram Teatrı olsun, Kukla teatrı olsun, bütün hamısına gedirdim.
İndi ancaq Kukla teatrına gedirəm. Həftənin şənbə və bazar
günlərini övladlarıma ayırıram, onları Kukla Teatrına aparıram.
Ancaq özüm düzünü deyim, son dəfə teatra nə vaxt getdiyimi
xatırlamıram. Sonuncu dəfə “Azdrama”da Hüseynbala Mirələmovun əsəri
əsasında qurulmuş, Qarabağ hadisələrindən bəhs edən “Xəcalət”
tamaşasında olmuşdum. Vaxt olmur. Çox xoşlayıram, amma təəssüflər
olsun ki, vaxt məhdudiyyəti olduğuna görə az-az gedirəm.
kult.az
-
Nida Xəbər 12:16
XİN Avropa Parlamentinə cavab verdi
-
Nida Xəbər 11:55
İlham Əliyev Almaniyada mühüm tədbirdə çıxış etdi - Yeniləndi
-
Nida Xəbər 10:29
Qriqoryan İrana hesabat verdi: Delimitasiya ilə bağlı
-
Nida Təhlil 09:26
Füzulidən Berlinə uçuş: Əliyevin təyyarəsi niyə Qarabağdan qalxdı?
-
Sosial08:42
Azərbaycanda general vəfat etdi
-
Magazin208:00
Şakira açıq-saçıq geyimi ilə heyrətləndirdi - FOTO
-
Yaxın Şərq07:30
"Hizbullah" İsraili artilleriyadan atəşə tutdu
-
Dünya06:46
ÜST-dən siqaretlə bağlı HƏYƏCAN TƏBİLİ: "Gənclərin 57%-i..."