Mask Trampın seçilməsi üçün bu qədər vəsait xərcləyib

Amerikalı milyarder İlon Maskın təsis etdiyi “Amerika PAC” adlı siyasi fəaliyyət komitəsinin ABŞ seçkilərində Respublikaçılar Partiyasının namizədi Donald Trampın seçilməsi üçün təxminən 200 milyon dollar xərclədiyi iddia edilib.

Publika.az xəbər verir ki, məsələdən xəbəri olan bir şəxs “Associated Press”ə (AP) “Amerika PAC” təşkilatının seçkilərdə Trampa verdiyi dəstəklə bağlı açıqlama verib.

Şəxsin iddiasına görə, “Amerika PAC” Trampın seçilməsi üçün təxminən 200 milyon dollar xərcləyib.

Mask əsas ştatlarda Trampı dəstəkləyən “Amerika PAC” kampaniyasına imza atanlar arasında noyabrın 5-dək hər gün seçilən şəxsə 1 milyon dollar verəcəyini açıqlayıb.

Püşkatmada iştirak etmək üçün qeydiyyatdan keçmiş seçicilər ünvan və telefon nömrəsi kimi şəxsi məlumatlarını təqdim etməli və kompaniyanı dəstəklədiklərini bildirən sənəd imzalamalı olublar.

Filadelfiya rayon prokuroru Larri Krasner " "Amerika PAC" və Mask 1 milyon dollar qazanmaq şansı müqabilində Filadelfiya vətəndaşlarını aldadaraq, şəxsi məlumatlarını ələ keçirirlər" deyərək Maskı qanunsuz lotereya təşkil etdiyi iddiası ilə məhkəməyə verib.

Məhkəmə Krasnerin müvəqqəti qadağan tələbini rədd edərək lotereyanın davam edə biləcəyinə qərar verib.

Roza