Fransada yaşayan alim: "İşğalçı ordu torpağımızdan çıxsın"

Fransada yaşayan Güney Azərbaycanlı tarixçi Səməd Xətai də bu günlərdə ürəyinin Azərbaycanda atdığını bildirərək, Qarabağ Ermənistan torpağıdır deyənlərə irad bildirib.

Səməd bəy Publika.az-a açıqlamasında Qarabağ toponiminin əsl mənasına da aydınlıq gətirib.

Birinci gəlin, əsas məsələyə aydınlıq gətirək. Karabax deyil Qarabağ- qara, bağ. Bizim mədəniyyətimizdə isə sözün mənası sıx, yamyaşıl, cənnət kimi gözəl bağ deməkdir. Bu sözün tarixi də, kökü də, mənsubiyyəti də Azərbaycana məxsusdur. Bu fakt su kimi aydındır. Düşmən bu torpağın adını lap min dəfə dəyişə bilər. Amma fakt dəyişmir. Bir neçə il öncə Qarabağ haqda mübahisəli məqalə oxudum. Onlara izahlı cavab yazdım. Bu gün ermənilər öz aralarında Qarabağ deyirlər. Yaxşı, əgər bu torpaq sizindirsə, bəs düşmən xalqın toponimini niyə istifadə edirsiniz? Demək, danışdığınız yalana özünüz də inanmırsınız.

Biz qeyri-qanuni heç bir addıma yol vermirik. Dünyanı yuxudan oyatmağa çalışıb, özü yazdığı qanunlara əməl etməyini tələb edirik. Bəli, müharibəsevən xalq deyilik. Savaş insanlığa qarşı addımdır. Qan tökməyə susamamışıq. Amma 30 ildir eyni mövzu bütün qətnamələrə rəğmən toz altında qalıb. Erməni qüvvələri, işğalçı ordusu torpağımızdan çıxsın. Tarix boyu tolerant Azərbaycan xalqı xristianlar, yəhudilərlə bir torpaqda yaşayıb, yaşayacaqlar da. Amma ermənilər torpaqlarımızı silahlı qüvvələrindən təmizləməlidirlər. Azərbaycan da bundan sonra ermənilərlə sülh içində yaşamağa davam etməlidir.

Leyla Sarabi