Avropa

Türkiyə bu Avropa ölkəsinə təbii qaz ixrac edəcək

27 Sentyabr 2023 13:06

Türkiyə Rumıniyaya təbii qaz ixrac edəcək.

Publika.az Türkiyə mətbuatına istinadən xəbər verir ki, BOTAŞ ilə Rumıniyanın OMV Petrom neft şirkəti arasında edilən razılaşmaya görə, Rumıniyaya gündəlik 4 milyon kubmetrə qədər təbii qaz ixrac ediləcək.

Məlumata görə, Rumıniyanın OMV Petrom neft şirkəti ilə ixrac müqaviləsi imzalanıb. Gündə 4 milyon kubmetrə qədər təbii qaz tədarükünü təmin edən müqavilə çərçivəsində 1 oktyabr 2023-cü il - 31 mart 2025-ci il tarixləri arasında Türkiyədən Rumıniyaya təbii qaz boru kəmərləri ilə ixrac ediləcək.

Tərəflər ötürmə, saxlama, istehsal və yaşıl enerji texnologiyaları, eləcə də təbii qaz ticarəti sahələrində əməkdaşlığı inkişaf etdirmək barədə razılığa gəliblər.

Qeyd edək ki, bugünədək bölgə ölkələri arasında yer alan Yunanıstan, Bolqarıstan və Macarıstana təbii qaz ixracı ilə bağlı razılaşmalar əldə edilib. Yeni ixrac müqavilələri üçün bir çox ölkə və şirkətlərlə danışıqlar davam edir.

Mehti Kamiloğlu