Yay tətili və dərs günləri azaldılır: Prezidentdən tövsiyə

Fransa prezidenti Emmanuel Makron məktəbdə yay tətilinin və gündəlik dərslərin sayının azaldılmasının zəruri olduğunu deyib.

Publika.az xəbər verir ki, onun fikirlərini yerli mətbuat yayıb.

"Hazırda paradoksal bir vəziyyətlə qarşılaşırıq: məktəb günləri çox sıx keçir və bu da, xüsusən də məktəbdən uzaqda yaşayanlar üçün yorğunluğa və stressə səbəb olur. Onlar səhər tezdən məktəbə gedirlər və axşam gec qayıdırlar. Bu, yorğunluğa səbəb olur. Eyni zamanda, bizim çox uzun tətillərimiz var - çox vaxt digər ölkələrə nisbətən daha uzun. Nəticədə, uşaqlar bu müddət ərzində öyrəndiklərinin bir hissəsini itirirlər", - Makron bildirib.

O, məktəb təqviminin daha balanslı olmasının lazım olduğuna inanır:

"Məktəblərin avqust ayında bir az tez başlaması və daha gec bitməsi mümkündür. Düşünürəm ki, bir aylıq tətil bəs olar".

O, bu ideyanın şagirdlər, onların valideynləri və müəllimlərlə əlavə müzakirələr tələb etdiyini söyləyib. Eyni zamanda, prezident bir çox ailənin bu cür tədbirləri dəstəklədiyini bildirib.

Qeyd edək ki, Fransada məktəb tətilləri ildə təxminən 16 həftə təşkil edir və bunun yarısı yay tətilini əhatə edir.

Adəm