Avropada informasiya savaşı: Rusiya mediasına çıxış bağlanır

Fransanın media tənzimləyicisi "Arcom" internet provayderlərindən Avropa İttifaqının sanksiya siyahısına daxil edilmiş Rusiya KİV-lərinə, o cümlədə 35 sayta çıxışın məhdudlaşdırılmasını tələb edib.

Publika.az xəbər verir ki, bu barədə qurumun yaydığı rəsmi məlumatda bildirilir.

Açıqlamada qeyd olunur ki, provayderlərə, domen adı xidmətləri göstərən şirkətlərə və axtarış sistemlərinə sözügedən saytların bloklanması və axtarış nəticələrindən çıxarılması barədə göstəriş verilib. Söhbət Avropa İttifaqının sanksiyalarına məruz qalmış Rusiya mediasının rəsmi internet resurslarından gedir.

Bundan əlavə, "Arcom" Rusiya televiziya və radio yayımına çıxış imkanı yaradan dörd striminq platformasının da axtarış nəticələrindən silinməsini tələb edib.

Xatırladaq ki, daha əvvəl Vyaçeslav Volodin Avropa ölkələrində sakinlərin alternativ informasiya axtarışı məqsədilə Rusiya KİV-lərinə daha çox müraciət etdiyini bildirib. Onun sözlərinə görə, yeni məhdudiyyətlər Avropa hakimiyyətlərinin fərqli mövqelərin yayılmasından ehtiyatlanması ilə əlaqədardır.

Adəm