Bizi İraqla müharibəyə də siz sürüklədiniz: Avropa ölkəsindən ABŞ-a ittiham

İspaniyanın Baş naziri Pedro Sançes ABŞ-ın İrana qarşı əməliyyatını tənqid edərək, bunu beynəlxalq hüququn pozulması adlandırıb.

Publika.az xəbər verir ki, “El Pais” Sançesin açıqlamasından sitat gətirib.

İspaniyanın baş naziri ABŞ, İsrail və İranı hərbi əməliyyatları dayandırmağa və diplomatiyaya qayıtmağa çağırıb. Sançes qeyd edib ki, İspaniya İran rejimini pisləyir, lakin münaqişənin bütün tərəflərinin hərəkətləri beynəlxalq hüquqa ziddir.

“Bu böhran hamımıza təsir edir və biz ABŞ, İran və İsraildən yubanmadan müharibəni dayandırmağı tələb edirik. Bir qanunsuz hərəkətə digəri ilə cavab vermək olmaz, bəşəriyyət tarixindəki ən böyük fəlakətlər belə başlayır... Bəşəriyyətin böyük fəlakətləri belə başlayır. Milyonlarla insanın taleyi ilə Rusiya ruleti oynaya bilməzsiniz. Biz sadəcə kiminsə qisasından qaçmaq üçün dünyaya və ya dəyərlərimizə zidd olan bir şeyə ortaq olmayacağıq. Bir sözlə, İspaniya hökumətinin mövqeyini “Müharibəyə yox” sözləri ilə ümumiləşdirmək olar”, - deyə Baş nazir bəyan edib.

Sançes ABŞ-ın rəhbərlik etdiyi Müttəfiqlərin İraqa qarşı müharibəsi ilə tarixi paralellər apararaq oxşar əməliyyatın bütün regionda uzunmüddətli qeyri-sabitliyə səbəb olduğunu qeyd edib.

"İyirmi üç il əvvəl fərqli bir ABŞ administrasiyası bizi Yaxın Şərqdə müharibəyə sürüklədi. O vaxtlar iddia edildiyi kimi, Səddam Hüseynin kütləvi qırğın silahlarını məhv etmək, demokratiyanı qurmaq və qlobal təhlükəsizliyi təmin etmək üçün aparılan müharibəyə. Amma əslində, geriyə baxdıqda, bu, əks təsir göstərdi və Berlin divarının yıxılmasından bəri qitəmizin yaşadığı ən böyük qeyri-sabitlik dalğasını tətiklədi", - Sançes bildirib.

Tural