Bu ölkə yanacaq sektorunda fövqəladə vəziyyət ELAN ETDİ

Rumıniya hökuməti 2026-cı il aprelin 1-dən iyunun 30-na qədər olan dövr üçün ölkənin neft sektorunda fövqəladə vəziyyətin tətbiq edilməsi barədə sərəncamı təsdiqləyib; sənəd hər üç aydan bir müddətin uzadılması imkanını da nəzərdə tutur.

Publika.az xəbər verir ki, sənəddə İran ətrafındakı münaqişənin səbəb olduğu yanacaq qiymətlərinin kəskin artımı şəraitində iqtisadiyyatı və əhalini dəstəkləməyə yönəlmiş tədbirlər kompleksi əks olunub.

Sahə şirkətlərinin ticarət əlavəsi 2025-ci ilin orta illik səviyyəsi ilə məhdudlaşdırılacaq, benzindəki bioloji əlavələrin payı icbari 8%-dən 2%-ə endiriləcək, dizel yanacağının xaricə çıxarılmasına isə yalnız İqtisadiyyat və Energetika nazirlikləri ilə razılaşdırıldıqdan sonra icazə veriləcək.

Rumıniya kabinetinin rəhbəri İlie Bolojan əvvəllər izah etmişdi ki, antikrizis paketinin əsasını xərclərin dövlət, özəl biznes və vətəndaşlar arasında bölüşdürülməsi prinsipi təşkil edir. Benzinin bahalaşması nəticəsində xəzinəyə daxil olan vəsaitlər büdcədə qalmayacaq, vergilərin azaldılması və müxtəlif güzəştlər vasitəsilə əhaliyə və şirkətlərə qaytarılacaq.

Sənədin təsdiqi iki dəfə təxirə salınıb: layihə müxalifət, hakim koalisiya tərəfdaşı olan Sosial Demokrat Partiyası, həmkarlar ittifaqları və bəzi ekspertlər tərəfindən tənqidə məruz qalıb. İşəgötürənləri, həmkarlar ittifaqlarını və vətəndaş cəmiyyəti nümayəndələrini birləşdirən məşvərətçi orqan (İqtisadi və Sosial Şura) mənfi rəy verərək bildirib ki, təklif olunan tədbirlər bazar mexanizmlərini pozacaq, az effektiv olacaq və digər malların bahalaşmasına səbəb olacaq.

Nəticədə, mətnə son ana qədər düzəlişlər edilib. Cümə axşamı Rumıniyada dizel yanacağının orta qiyməti psixoloji həddi aşaraq litr üçün 10 leyi (2 avro) keçib.

Hüseyn İbadlı