Avropa ölkəsində bankomatlar partladılır - Yaralı var

Həftə ərzində Niderlandın müxtəlif şəhərlərində ard-arda bankomatların partladılması hadisələri baş verib, insidentlərdən biri zamanı yeniyetmə qız yaralanıb.

Publika.az ANP agentliyinə istinadla xəbər verir ki, polis bu hücumlar arasında əlaqənin olduğunu istisna etmir.

Mənbənin bildirdiyinə görə, ilk hücumlardan biri Utrext əyalətindəki Lopik şəhərində qeydə alınıb. Partlayış qurğunun yerləşdiyi binaya ciddi ziyan vurub, ikinci mərtəbədəki mənzilin sakinləri təxliyə edilib. Nağd pulların oğurlanması ehtimalı ilə bağlı məlumatlar hazırda dəqiqləşdirilir.

Digər bir insident Amsterdamın Nyiv-Vest rayonunda qeydə alınıb. Partlayış nəticəsində bankomat tamamilə məhv olub, zərbə dalğası binanın pəncərələrini sıradan çıxarıb. Hadisə zamanı qəlpə yaraları alan yeniyetmə qız tibb müəssisəsinə çatdırılıb. Pul vəsaitlərinin oğurlanması barədə məlumatlar hələlik yoxdur.

Bundan əlavə, Amsterdam aqlomerasiyasının kənarında yerləşən Badhuvedorp və Landsmeerdə təxminən yarım saatlıq fasilə ilə iki bankomat partladılıb. Birinci halda, iki ehtimal edilən cinayətkar mopedlə qaçmağa nail olsa da, qısa müddət sonra Amsterdamda saxlanılıblar.

İstintaqın versiyasına görə, Landsmeerdəki partlayışda başqa şəxslər iştirak edib; hadisələr arasındakı mümkün əlaqə yoxlanılır.

Polis, həmçinin eyni şəxslərin bu insidentlərdə, eləcə də martın 23-ü səhər saatlarında Amsterdam-Zöyd rayonu və Laren şəhərində baş verən partlayışlarda və martın ortalarında Amsterdam otellərindən birindəki oxşar hadisədə əli olması versiyasını araşdırır.

Hüseyn İbadlı