Onlar Trampın tənbehlərini ardıcıllıqla dinləməli olurlar - “Spiegel”

ABŞ Prezidenti Donald Tramp xalqa müraciəti zamanı İranla uğursuz müharibəyə görə qəzəbini Avropa siyasətçiləri və NATO-dan çıxararaq onlara qarşı aqressiv ritorikadan istifadə edib.

Publika.az xəbər verir ki, bu barədə Almaniyanın "Spiegel" nəşri məlumat yayıb.

"O, qəzəbini avropalılardan - müharibə başlamazdan əvvəl hətta xəbərdarlıq etmədiyi tərəfdaşlarından çıxarır", — deyə nəşr qeyd edir.

"Spiegel"in fikrincə, Avropa ölkələri müttəfiqlik münasibətlərini və hər şeydən əvvəl Ukraynaya dəstəyi qoruyub saxlamaq üçün Donald Trampın kəskin bəyanatları və davranışı ilə barışmalı, faktiki olaraq bir-birinin ardınca gələn "tənbehləri" dinləməli olurlar.

Xatırladaq ki, bundan əvvəl Tramp İrana qarşı hərbi əməliyyatı "iki saniyəyə" bitirməyin mümkün olduğunu bildirmişdi. Amerika liderinin sözlərinə görə, Vaşinqton rəhbərliyin təmkinli olması səbəbindən bunu etmir. O, həmçinin İranda "məhv edilməsi mümkün olan hər şeyin məhv edildiyini" qeyd edib.

Hüseyn İbadlı