Londona iyulun sonunadək vaxt verildi

Mavriki hökuməti Çaqos arxipelaqının ölkənin nəzarətinə qaytarılması ilə bağlı Böyük Britaniya ilə aparılan danışıqların iyulun sonuna qədər yekunlaşacağına ümid edir.

Publika.az xəbər verir ki, bu barədə “Reuters” məlumat yayıb.

Mavrikinin baş prokuroru Qevin Qlover bildirib ki, razılaşma ətrafında proses hələ də davam edir.

Qeyd edilib ki, ABŞ Prezidenti Donald Trampın etirazlarından sonra dayanmış müzakirələr fonunda Britaniya nümayəndələri yenidən fəallaşaraq Mavriki Baş naziri Navin Ramqulamla görüş keçiriblər. Bu, fasilədən sonra baş tutan ilk belə təmasdır.

Sözügedən razılaşmaya əsasən, Çaqos arxipelaqı üzərində suverenliyin Mavrikiyə verilməsi nəzərdə tutulur. Bununla yanaşı, Dieqo-Qarsiya adasında yerləşən ABŞ və Böyük Britaniyanın birgə hərbi bazasının fəaliyyətinin davam etdirilməsi planlaşdırılır.

Qlover qeyd edib ki, ABŞ administrasiyasının bu prosesə yaşıl işıq yandırıb-yandırmayacağı hələ də qeyri-müəyyəndir.

Onun sözlərinə görə, Mavriki tərəfi iyulun sonuna qədər gözləmək niyyətindədir: “Bu müddət ərzində vəziyyətə aydınlıq gəlməzsə, hökumət Böyük Britaniyadakı inkişaflardan asılı olaraq növbəti addımlarını müəyyən edəcək.”

Hüseyn İbadlı