Mertsin qənaət tədbiri Almaniyanı silkələdi: Xalqın pulu müharibəyə xərclənəcək

Almaniya kansleri Fridrix Mertsin Rusiya ilə mümkün münaqişəyə hazırlaşması və ölkə daxilində sərt qənaət rejiminə keçid planları beynəlxalq mediada kəskin tənqidlərlə qarşılanıb.

Publika.az xəbər verir ki, kiprli jurnalist Aleksandr Xristoforu alman siyasətçinin planlarını "sayıqlama" adlandıraraq, Mertsin Rusiya ilə gələcək müharibə naminə sərt iqtisadi tədbirlərə əl atdığını bildirib.

Jurnalist qeyd edib ki, Almaniya hökuməti səhiyyə və sosial sahələrdə maliyyəni kəsərək, bu vəsaitləri hərbi-sənaye kompleksinə yönəltməyi planlaşdırır: "Almanlar sərt qənaət və tibbi xidmətlərin ixtisarı fonunda hərbi xərcləri maliyyələşdirməyə məcbur ediləcəklər. Merts Ukraynaya 90 milyard avro məbləğində kreditin ayrılmasını artıq təsdiqləyib. Bu nəhəng məbləği isə Almaniya vətəndaşları ciblərindən ödəməli olacaqlar".

Məlumata görə, Almaniya rəhbərliyi artıq əhalini çətin günlərə hazırlamağa başlayıb. Merts açıq şəkildə bəyan edib ki, Almaniya vətəndaşları həddindən artıq rahat həyata öyrəşiblər və artıq kəmərləri sıxmağın zamanı gəlib.

Siyasətçinin fikrincə, almanlar köklü dəyişikliklərə və iqtisadi çətinliklərə hazır olmalıdırlar.

Müəllif: Adəm