Avropa perspektivi masadadır, Ermənistan özü qərar verəcək - Kallasdan mesaj

Avropa diplomatiyasının rəhbəri Kaqa Kallas Ermənistanın Aİ-yə üzvlük perspektivləri ilə bağlı şərh verib.

Publika.az xəbər verir ki, Kallas İrəvanda AQS sammiti çərçivəsində keçirilən brifinqdə bildirib ki, Ermənistan öz qərarlarını özü verir:

“Seçkilər bir aydan sonra keçiriləcək. Əlbəttə ki, Avropa perspektivi masadadır və Ermənistan özü qərar verəcək".

Ermənistan xarici işlər nazirinin müavini Vahan Kostanyan bir müddət əvvəl bildirib ki, Ermənistan respublikanın 2028 və ya 2030-cu ildə Avropa İttifaqının üzvü olacağına inanacaq qədər sadəlövh deyil.

Rusiya Baş nazirinin müavini Aleksey Overçuk bir müddət əvvəl bildirib ki, Ermənistan Aİ-nin Rusiyaya qarşı aqressiv mövqedə olan hərbi-siyasi birliyə çevrildiyini nəzərə almalıdır.

Aprelin 1-də Moskvada Ermənistanın Baş naziri Nikol Paşinyan və Rusiya Prezidenti Vladimir Putin arasında danışıqlar aparılıb. Görüş zamanı Putin bildirib ki, Moskva İrəvanın Aİ ilə münasibətlər üzrə müzakirələrindən xəbərdardır və bu müzakirələrə sakit yanaşır.

Lakin Rusiya lideri açıq şəkildə bildirib ki, İrəvanın həm Aİ-yə, həm də AİB-ə eyni vaxtda üzvlüyü mümkün deyil. Paşinyan öz növbəsində qeyd edib ki, İrəvan AİB-ə üzvlüyün Aİ üzvlüyü ilə uyğunsuz olduğunu bilir, lakin bu proseslər hələ seçim edilməli olan nöqtəyə çatmayıb.

Müəllif: Tural