Aİ-yə qeyri-qanuni keçidlərin sayı 40 faiz azaldı - Buna necə nail oldular?

Bu ilin ilk dörd ayında Avropa İttifaqı (Aİ) sərhədlərindən qeyri-qanuni keçidlərin sayı ötən ilin eyni dövrü ilə müqayisədə 40 faiz azalaraq 28 min 500-dən bir qədər çox olub.

Publika.az xəbər verir ki, bu barədə Aİ-nin Sərhəd və Sahil Mühafizəsi Agentliyinin (Frontex) məlumatında qeyd edilib.

Azalma tərəfdaş ölkələrlə əməkdaşlığın gücləndirilməsi, əsas çıxış ölkələrində qabaqlayıcı tədbirlərin görülməsi və ilin əvvəlində müşahidə olunan əlverişsiz hava şəraiti ilə bağlıdır.

Mərkəzi Aralıq dənizi marşrutu ilin ilk dörd ayında Aİ-yə qeyri-qanuni miqrasiyanın ən intensiv istiqaməti olub. Bu marşrut üzrə təxminən 8500 keçid qeydə alınıb. Ötən ilin analoji dövrü ilə müqayisədə 46 faiz azalma var. Əsas çıxış nöqtəsi yenə də Liviya olub. Ən kəskin azalma isə Qərbi Afrika marşrutunda qeydə alınıb - qanunsuz keçidlərin sayı 78 faiz azalaraq təxminən 2300-ə düşüb. Bu. Mavritaniya, Seneqal və Qambiyanın İspaniya və Aİ ilə əməkdaşlıq çərçivəsində həyata keçirdiyi qabaqlayıcı tədbirlərlə əlaqələndirilir.