Rusiya ilə danışıqlarda vasitəçi kim olsun? - Avropa naçar qalıb

Avropa Rusiya ilə danışıqlar aparacaq şəxs üçün potensial namizədləri müzakirə etməyə davam etsə də, əsas maneə Avropa İttifaqı (Aİ) ölkələrinin vahid namizəd üzərində razılığa gələ bilməməsidir.

Publika.az xəbər verir ki, bu barədə "Politico" məlumat yayıb.

Müzakirə olunan şəxslər arasında Almaniyanın keçmiş kansleri Angela Merkel, Finlandiya prezidenti Aleksandr Stubb və İtaliyanın keçmiş baş naziri Mario Draqi var.

Qeyd olunur ki, Merkelin Rusiya Prezidenti Vladimir Putin və Ukrayna Prezidenti Volodimir Zelenski ilə birbaşa təmaslarda təcrübəsi var, lakin bəzi Avropa siyasətçiləri onun keçmiş vasitəçilik səylərini uğursuz hesab edirlər.

Stubb əvvəllər də oxşar rolda maraqlı olduğunu bildirmişdi, lakin Finlandiyanın NATO üzvlüyü onun Moskvadakı qavrayışını çətinləşdirə bilər, Draqi isə daha neytral namizəd kimi görünür, baxmayaraq ki, o, açıq şəkildə vasitəçi kimi iştirak etməyə hazır olduğunu bildirməyib.

Daha əvvəl məlum olmuşdu ki, Aİ-nin xarici işlər və təhlükəsizlik siyasəti üzrə ali nümayəndəsi Kaya Kallas Rusiya ilə dialoqda özünü vasitəçi kimi təqdim etməkdən imtina edib.

Müəllif: Tural