Fransada tarixi qərar: 341 illik qul qanunu ləğv edildi

Fransa Milli Assambleyası XVII əsrdə qəbul edilmiş və qulları “əmlak” kimi tanıyan məşhur “Qara kodeks”in ləğvi üçün yekdilliklə səs verib.

Publika.az xəbər verir ki, bu barədə “The Guardian” məlumat yayıb.

Bildirilir ki, sözügedən qanun 1685-ci ildə kral XIV Lüdovik tərəfindən imzalanmışdı və Fransa müstəmləkələrində qullarla davranış qaydalarını tənzimləyirdi. 60 maddədən ibarət sənəd qulları “daşınan əmlak” kimi təqdim edir, qaçmağa cəhd edənlərin şikəst edilməsinə icazə verir və onların ifadələrini dəyərsiz hesab edirdi.

Səsvermə parçalanmış Fransa parlamentində nadir siyasi birlik nümunəsi kimi qiymətləndirilib. Fransa prezidenti Emmanuel Makron qanunun qüvvədə qalmasını “təhqir” adlandıraraq qul ticarəti ilə bağlı reparasiyaların müzakirəsinin vacibliyini vurğulayıb. O, eyni zamanda bu məsələ ilə bağlı cəmiyyətə yalan vədlər verilməməli olduğunu bildirib.

Fransanın əcdadları qul olmuş deputatlar çıxışları zamanı göz yaşlarını saxlaya bilməyiblər. Onlar bunun tarixi ədalətsizliyin aradan qaldırılması istiqamətində mühüm addım olduğunu deyiblər.

Qanunun ləğvinin təşəbbüskarı deputat Maks Matiassen isə səsverməni “əcdadlarla əlaqənin bərpası” adlandırıb. Onun sözlərinə görə, bu qərar Fransanın əsas prinsipi olan bərabərlik və qardaşlıq ideyasının təsdiqi üçün vacibdir.

Adəm