Britaniyalı siyasətçidən 8 yaşlı qızı vasitəsilə qisas alıblar

Böyük Britaniyanın sabiq deputatı və "Breksit"in fəal tərəfdarlarından olan Duqlas Karsvell səkkiz yaşlı qızının Londondakı məktəbdən çıxarıldığını iddia edib.

Publika.az xəbər verir ki, bu barədə o, "Independent" nəşrinə danışıb.

Karsvellin sözlərinə görə, hadisə Avropa İttifaqından çıxışın tərəfdarlarına qarşı göstərilən əsassız və aqressiv münasibətin nəticəsində olub.

Siyasətçi Entoni Seldonun kitabı üçün yazdığı məqalədə qeyd edib ki, referendumdan əvvəl "Breksit" tərəfdarlarına sadəcə qəribə insanlar kimi baxılırdı. Lakin səsvermədən sonra onlar mediada irqçi və hətta Kremlin agentləri kimi təqdim edilməyə başlanıb.

Karsvell hesab edir ki, nifrətin artması ilə bağlı səsləndirilən ittihamlar uydurma olub və seçkidə qalib gələnlərin hədəfə alınması şəxsi xarakter daşıyıb.

O, həmçinin referendumdan sonrakı dövrdə Boris Conson və Maykl Qouvun fəaliyyətini sərt tənqid edib. Karsvell onların ilk mətbuat konfransında özlərini inamsız apardıqlarını və dərhal daxili çəkişmələrə başladıqlarını bildirib.

Sabiq deputatın fikrincə, məhz bu qarşıdurma Tereza Meyin hakimiyyətə gəlməsinə səbəb olub. O, Meyin "Breksit" danışıqlarını isə mənasız adlandırıb.

Karsvell əlavə edib ki, Böyük Britaniya bu gün də həmin yanlış qərarların nəticələrini yaşayır. Onun sözlərinə görə, ölkə formal olaraq Avropa İttifaqından ayrılsa da, “Avropa xəstəliyi” adlandırdığı problemlərdən xilas ola bilməyib və vəd edilən böyük dəyişikliklər baş verməyib.

Adəm