Aİ bu ölkələrin vətəndaşları üçün viza qaydalarını sərtləşdirir

Avropa Komissiyası (AK) Avropa İttifaqının (Aİ) viza siyasətinin daha da sərtləşdirilməsini nəzərdə tutan yeni tədbirlər paketi hazırlayır.

Publika.az xəbər verir ki, bu barədə TASS-a Brüsseldəki diplomatik mənbə məlumat verib.

Bildirilib ki, payızda təqdim olunması planlaşdırılan dəyişikliklər təhlükəsizlik səbəbləri ilə viza verilməsindən imtina üçün əlavə meyarların tətbiqini nəzərdə tutur. Yeni məhdudiyyətlərin ilk növbədə Rusiya, Belarus və İran vətəndaşlarına şamil ediləcəyi qeyd olunur. Bununla belə, siyahının gələcəkdə genişləndirilə biləcəyi istisna edilmir.

Avropa Komissiyasının nümayəndəsi Markus Lammert daha əvvəl açıqlamasında qeyd edib ki, rusiyalılara verilən vizaların sayı son illərdə kəskin azalıb. Onun sözlərinə görə, bu göstərici 4 milyondan bir qədər artıq 500 minə düşüb.

Xatırladaq ki, iyunun əvvəlində azı 11 Avropa ölkəsi yay turizm mövsümü ərəfəsində rusiyalıların Şengen zonasına giriş qaydalarının sərtləşdirilməsi ilə bağlı Avropa Komissiyasına müraciət ünvanlayıb. Sənədi Baltikyanı üç ölkə, Çexiya, Danimarka, Finlandiya, Niderland, Polşa və İsveç, eləcə də Aİ-yə üzv olmayan İslandiya və Norveç imzalayıb.

Adəm