Macarıstan Ukraynanın Aİ-yə üzvlüyü ilə bağlı “yaşıl işıq” yandırdı

Macarıstan Ukraynanın Avropa İttifaqına (Aİ) daxil olması ilə bağlı danışıqlara başlamağa razılıq verib.

Publika.az xəbər verir ki, bu barədə Macarıstanın baş naziri Peter Madyar "Facebook" sosial şəbəkəsində yayımladığı videomüraciətdə bildirib

O deyib ki, danışıqlar iyunun 15-də başlayacaq, lakin bu, çoxillik prosesin yalnız ilk addımıdır.

Baş nazir qeyd edib ki, Ukrayna hökuməti Zakarpatya macarlarının hüquqları ilə bağlı tarixi sazişi yerinə yetirməyi rəsmən öhdəsinə götürdüyü üçün Macarıstan iyunun 15-də, bazar ertəsi günü Aİ ilə Ukrayna arasında ilk danışıqlar blokunun açılmasına razılıq verə bilib.

Madyar üzvlük prosesinin uzunmüddətli olacağını vurğulayıb. O, buna nümunə olaraq Monteneqronu göstərib və həmin ölkənin üzvlüklə bağlı danışıqlarının hələ 2012-ci ildə başladığını, lakin indiyədək başa çatmadığını xatırladıb.

Xatırladaq ki, daha əvvəl Macarıstanın xarici işlər naziri Anita Orban Ukraynanın və ya hər hansı digər ölkənin Avropa İttifaqına daxil olmasının onun öz nailiyyətlərinə əsaslanmalı olduğunu bəyan etmişdi.

Hüseyn İbadlı