Orban yenidən lider seçildi

Macarıstanın keçmiş baş naziri Viktor Orban Budapeştdə keçirilən 32-ci qurultayda "Fides" partiyasının sədri vəzifəsinə yenidən seçilib.

Publika.az "M1" telekanalına istinadla xəbər verir ki, sədr vəzifəsinə yeganə namizəd olan Orban gizli səsvermə zamanı 737 etibarlı səsdən 729-nu toplayıb.

Qurultayda partiya sədrinin dörd müavini də seçilib. Beləliklə, Kinqa Qal, Yanoş Boka, Alpar Gyöporoş və Balaj Kreçi partiya rəhbərliyinin yeni tərkibini formalaşdırıblar.

Tədbir çərçivəsində nümayəndələr partiya orqanlarının hesabatlarını təsdiqləyib, miqrasiya siyasəti və milli suverenlik kimi məsələlərə dair sənədləri qəbul ediblər. "Fides"in təşkilati strukturunda da dəyişikliklər edilib, idarəetmə sistemi yenidən nəzərdən keçirilib və milli rəhbərliyin tərkibi genişləndirilib.

Qurultayda çıxış edən Orban partiyanın siyasi xəttinin daha da möhkəmləndirilməsinin vacibliyini vurğulayıb. O, kadr heyətinin yenilənməsi planlarını açıqlayaraq, gələcəkdə gənc nəsillərin rəhbər vəzifələrə cəlb edilməsinin əhəmiyyətini qeyd edib.

Hüseyn İbadlı