NATO Şimalda nəzarəti gücləndirir - Üç ölkə ittifaq qurdu

Norveç, Almaniya və Böyük Britaniya Şimali Atlantika və Uzaq Şimalda sualtı qayıqların aşkar edilməsi və izlənməsi sahəsində əməkdaşlığı genişləndirmək barədə razılığa gəliblər.

Publika.az Norveç hərbi idarəsinə istinadla xəbər verir ki, müvafiq saziş üç ölkənin müdafiə nazirləri tərəfindən Brüsseldə keçirilən NATO görüşündə imzalanıb.

Əldə edilmiş razılaşmalara əsasən, tərəflər sualtı aktivliyin monitorinqi ilə birgə məşğul olmaq, həmçinin sualtı təhdidlərin aşkar edilməsi, müşayiəti, mühafizəsi və onlara qarşı mübarizə istiqamətində fəaliyyətlərini əlaqələndirmək niyyətindədirlər.

Norveçin müdafiə naziri Tore Sandvik bildirib ki, ölkənin coğrafi mövqeyi sualtı müdafiə məsələlərini həm milli təhlükəsizlik, həm də bütün Şimali Atlantika Alyansı üçün xüsusilə vacib edir. Onun sözlərinə görə, Oslo Norveçin və Avropanın müdafiə imkanlarını gücləndirməkdə davam edir.

Norveç hərbi idarəsinin rəhbəri müttəfiqlərlə həyata keçirilən əməkdaşlıq layihələrini də xatırladıb. Xüsusilə, Norveç yeni sualtı qayıqları Almaniya ilə birlikdə, yeni freqatları isə Böyük Britaniya ilə tərəfdaşlıq çərçivəsində almaq niyyətindədir.

Tore Sandvikin sözlərinə görə, yeni saziş üç dövlətin müdafiə sahəsindəki qarşılıqlı əlaqələrini region üçün strateji əhəmiyyətə malik olan sahədə daha da sıx birləşdirməyə imkan verəcək.

Əldə edilmiş razılaşmalar müttəfiqlərin şimal dəniz bölgələrində hərəkətlərinin daha dərin koordinasiyasını nəzərdə tutur, burada sualtı vəziyyətin nəzarətdə saxlanılması məsələləri NATO-nun kollektiv təhlükəsizliyinin əsas elementlərindən biri kimi nəzərdən keçirilir.

Hüseyn İbadlı