Tramp Ukrayna ilə bağlı mövqeyini yumşaldıb - Makron

Fransada 15-17 iyun tarixlərində keçirilən G7 (Böyük Yeddilik) sammitində Ukrayna münaqişəsi ətrafında Qərb ölkələrinin mövqelərinin yaxınlaşdığı iddia olunub.

Publika.az-ın məlumatına görə, Fransa prezidenti Emmanuel Makron bildirib ki, sammit çərçivəsində ABŞ prezidenti Donald Trampın Ukrayna ilə bağlı mövqeyində dəyişiklik qeydə alınıb.

Makronun sözlərinə görə, Vladimir Zelenski ilə Tramp arasında baş tutan görüş və Avropa ölkələri, Kanada, Yaponiya və ABŞ arasında əldə edilən “ümumi razılaşma” son günlərin mühüm diplomatik nəticələrindən biri olub.

“Danışıqların keyfiyyəti, Zelenski ilə Tramp arasında aparılan müzakirələr və ilk dəfə olaraq Avropa ölkələri, Kanada, Yaponiya və ABŞ arasında yaxınlaşma ciddi nəticədir”, - deyə Makron bildirib.

Onun sözlərinə görə, Tramp artıq Ukraynanın müharibədə məğlub olduğu fikrini əvvəlki kimi qəti şəkildə qəbul etmir və tərəflər arasında gələcək danışıqlar üçün yeni çərçivə formalaşır.

Tramp isə sammitdən sonra Hindistanın baş naziri Narendra Modi ilə görüşü zamanı jurnalistlərə açıqlamasında Ukraynanın ABŞ istehsalı olan “Patriot” zenit-raket kompleksləri üçün raket istehsalı ilə bağlı müraciətini nəzərdən keçirəcəklərini deyib.

O, münaqişəyə görə məsuliyyətlə bağlı suala isə konkret cavab verməkdən imtina edib. Tramp həmçinin Ukraynadakı vəziyyətin döyüş meydanında “nisbətən yaxşı” olduğunu desə də, Rusiyanın hərbi güc baxımından böyük üstünlüyə malik olduğunu qeyd edib.

Adəm