İran nümayəndə heyəti İsveçrəyə səfər etdi

İran nümayəndə heyəti İsveçrəyə gəlib.

Publika.az xəbər verir ki, bu barədə İsveçrə Konfederasiyasının Xarici İşlər Nazirliyi "X" sosial şəbəkəsində məlumat yayıb.

İsveçrənin xarici siyasət idarəsi İslam Respublikası nümayəndələrinin gəlişini alqışlayıb. Nazirliyin paylaşımında bildirilir ki, İran nümayəndə heyəti Amerika Birləşmiş Ştatları ilə İran arasında imzalanmış anlaşma memorandumu çərçivəsində Bürgenştoka gedir.

Bundan əvvəl ABŞ-ın vitse-prezidenti Cey Di Vens İslam Respublikası ilə danışıqlar aparmaq üçün Vaşinqtondan İsveçrəyə uçub. Pakistanın baş naziri Şahbaz Şərif də yüksək səviyyəli nümayəndə heyəti ilə birlikdə həmin istiqamətə yola düşüb.

İyunun 18-nə keçən gecə ABŞ və İran hərbi əməliyyatların dayandırılmasını təsdiq edəcək və danışıqların yeni mərhələsini başladacaq müvəqqəti anlaşma memorandumunu məsafədən imzalayıblar. Ölkə nümayəndə heyətlərinin İsveçrədə üz-üzə görüşü növbəti günə planlaşdırılsa da, görüşdən bir neçə saat əvvəl İsrail Livanda "Hizbullah" şiə hərəkatının obyektlərinə yeni zərbələr endirib. Bundan əvvəl isə İsrailin baş naziri Binyamin Netanyahu bəyan etmişdi ki, ölkəsi "təhlükəsizlik zonası"nı qoruyub saxlamaq üçün qoşunlarını Livanın cənub sərhədyanı bölgələrindən çıxarmaq niyyətində deyil. Nəticədə, İran ABŞ ilə görüş keçirməkdən imtina etmişdi.

Hüseyn İbadlı