ABŞ bu ölkədən geri çəkilir: Yüzlərlə əsgər artıq çıxarıldı

ABŞ-ın Estoniyada yerləşdirilən hərbi kontingentinin böyük hissəsi ölkəni tərk edib.

Publika.az xəbər verir ki, bu barədə ERR məlumat yayıb.

Estoniyanın müdafiə naziri Hanno Pevkur bildirib ki, yay aylarında ölkəyə yeni ABŞ hərbi kontingentinin gəlməsi gözlənilir və onun ilin sonuna qədər Estoniyada qalması planlaşdırılır. Lakin bununla bağlı yekun qərar hələ qəbul edilməyib.

Nazirin sözlərinə görə, məsələ ABŞ Müdafiə Nazirliyinin Avropadakı hərbi mövcudluqla bağlı apardığı altı aylıq qiymətləndirmənin nəticələrindən asılıdır.

ABŞ hərbçiləri indiyədək Estoniyanın Tapa hərbi bazasında və digər ərazilərdə xidmət edirdi. Onların sayı ümumilikdə 500–700 nəfər təşkil etsə də, hazırda ölkədə 100-dən az amerikalı hərbçi qalıb. Bu qüvvələr Polşa və ya Rumıniyada yerləşən briqadadan rotasiya əsasında Estoniyaya göndərilmişdi.

Estoniya parlamentinin milli müdafiə komitəsinin sədri Kalev Stoyçesku isə bildirib ki, ABŞ təkcə Estoniyanı deyil, NATO-nun şərq cinahındakı digər ölkələri də qeyri-müəyyən vəziyyətdə qoyub.