Türklər qayıdır – Yunanıstanda nədən narahatdırlar?

Ankaranın ev sahibliyi etdiyi NATO Zirvəsi çərçivəsində Prezident Rəcəb Tayyib Ərdoğan və ABŞ Prezidenti Donald Tramp arasında keçirilən görüşdən sonra Türkiyənin F-35 qırıcı təyyarələri proqramına yenidən qatılması ehtimalı Yunanıstan gündəmində ən vacib mövzulardan biri olaraq qalır.

Publika.az “Milliyyet”ə istinadla xəbər verir ki, Yunanıstanın aparıcı nəşrləri “Kathimerini” və “in.gr” Ankara ilə Vaşinqton arasında əlaqələrin yeni mərhələyə qədəm qoyduğunu və Afinanın hazırda Türkiyənin F-35 proqramına qayıtması ehtimalını ciddi şəkildə nəzərdən keçirdiyini bildiriblər.

Yunanıstan mətbuatının verdiyi xəbərlərdə Vaşinqton və Ankaranın Türkiyənin F-35 proqramına yenidən qoşulması üçün yol aça biləcək siyasi və hüquqi variantlar üzərində işlədiyi iddia edilərək, "Bu proses uzun çəkməyəcək; başqa sözlə, türklər geri qayıdır" əlavə edilib.

Təhlillər göstərir ki, ABŞ Prezidenti Trampın Prezident Ərdoğana əvvəllər verdiyi mesajlara uyğun olaraq iki ölkə arasında həll yolu axtarışı sürətlənib və Türkiyənin 2019-cu ildə proqramdan çıxarılmasına səbəb olan S-400 məsələsinin yenidən müzakirəyə çıxarıldığı iddia edilir.

Yunanıstan mətbuatındakı təhlillərdə Türkiyənin F-16 modernləşdirmə proqramı ilə bağlı iddialar da yer alıb. Bundan əlavə, Türkiyənin milli qırıcı təyyarəsi KAAN-da istifadəsi planlaşdırılan F-110 mühərrikləri ilə bağlı inkişafların Vaşinqton-Ankara təmaslarında müzakirə olunan vacib mövzular arasında olduğu bildirilib.

Yunan mətbuatının şərhlərində Türkiyənin geosiyasi mövqeyi, regional böhranlardakı rolu və NATO-nun cənub cinahındakı kritik çəkisi səbəbindən Vaşinqton üçün əhəmiyyətini qoruduğu bildirilir.

İddia olunur ki, Ankaranın Qara dənizdən Yaxın Şərqə və Qafqazdan Şərqi Aralıq dənizinə qədər uzanan geniş coğrafi ərazidəki rolu ABŞ üçün strateji əhəmiyyət kəsb edir və buna görə də Türkiyə ilə münasibətlərin yenidən qurulması ön plana çıxıb.

Müəllif: Tural