Aİ uşaqlar üçün sosial şəbəkələrə yaş məhdudiyyəti tətbiq edəcək

Avropa Komissiyası uşaqların sosial şəbəkələrdən istifadəsinin yaratdığı risklərlə bağlı ekspert hesabatı hazırlayıb. Sənədin Aİ üzrə yaş məhdudiyyətinin tətbiqinə zəmin yaradacağı bildirilir.

Publika.az xəbər verir ki, bu barədə "Politico" nəşri mənbələrə istinadən məlumat yayıb.

Psixoloqlar da daxil olmaqla onlarla mütəxəssisin hazırladığı hesabatın bazar ertəsi açıqlanacağı gözlənilir. Sənədin Avropa Komissiyasının sədri Ursula fon der Lyayenin Aİ üzrə vahid yaş məhdudiyyətinin tətbiqi təşəbbüsündə mühüm rol oynayacağı qeyd edilir.

Avropa rəsmilərindən birinin sözlərinə görə, hesabat sosial şəbəkələrin uşaqlara təsiri ilə bağlı elmi əsaslar təqdim etməklə bu məsələyə skeptik yanaşan üzv dövlətləri inandırmağı hədəfləyir.

Bildirilib ki, Ursula fon der Lyayen sosial şəbəkələrdən istifadə ilə bağlı ümumavropa yaş məhdudiyyəti planını sentyabr ayında təqdim edəcək. Yeni qaydalar rəqəmsal platformaları müəyyən edilmiş yaş həddinə çatmayan uşaqların hesab yaratmasına mane olmağa məcbur edə bilər.

Qeyd edək ki, Fransa, İspaniya, Almaniya, Danimarka və Yunanıstan da uşaqların sosial şəbəkələrdən istifadəsini məhdudlaşdıran qaydalar üzərində işləyir. Avstraliya isə 16 yaşdan kiçik şəxslərin ən böyük sosial şəbəkələrdə qeydiyyatını qadağan edən ilk ölkə olub.