Avropa Rusiyada qaz qoymayıb, hamısını alıb

2026-cı ilin birinci yarısında Avropa Rusiyanın flaqman “Yamal LNG” zavodundan əvvəlkindən daha çox mayeləşdirilmiş təbii qaz idxal edib.

Publika.az xəbər verir ki, Aİ-nin Rusiya qaz idxalına qoyduğu qadağa qüvvəyə minməzdən əvvəlki aylarda Sibir zavodunun demək olar ki, bütün məhsulu Avropa şirkətləri tərəfindən alınıb.

Bu barədə "Financial Times" qəzeti məlumat verir .

“Kpler” analitik şirkətinin məlumatına görə, Rusiyanın özəl şirkəti “Novatek” tərəfindən idarə olunan “Yamal LNG”dən Aİ-nin alışı ilin ilk altı ayında rekord həddə - 9,89 milyon tona çatıb ki, bu da ötən ilin eyni dövrü ilə müqayisədə 18 faiz artım deməkdir.

Hesablamalara görə, Avropa bu təchizat üçün çox güman ki, 6 milyard avroya qədər vəsait ödəyib.

“Kpler” məlumatlarına görə, əsas Avropa alıcıları Fransa, Belçika və İspaniya olub və onlar 2026-cı ilin birinci yarısında “Yamal”dan müvafiq olaraq 3,6 milyon, 2,9 milyon və 2,7 milyon ton idxal ediblər.

Aİ qaydaları artıq qısamüddətli müqavilələr çərçivəsində Rusiya LNG-sinin alınmasını qadağan edir, yəni “Yamal”dan Avropaya göndərilən hər bir qaz daşınması üçün idxalçı ölkənin gömrük orqanlarından satışın uzunmüddətli müqavilə çərçivəsində baş verdiyini təsdiqləməsi tələb olunur.

Aİ-nin uzunmüddətli müqavilələr çərçivəsində Rusiya mayeləşdirilmiş təbii qazının idxalına qoyduğu qadağa 2027-ci il yanvarın 1-dən qüvvəyə minəcək. Bu, Rusiyanı alternativ yollar axtarmağa məcbur edəcək. Həmin ilin sonlarında boru kəmərləri ilə qaz idxalı da qadağan ediləcək.

Müəllif: Tural