Avropa taxılsız qaldı - İsti hava məhv edib

Avropada iyun ayında baş verən isti hava iki milyard avro dəyərində taxıl məhsulunu məhv edib.

Publika.az xəbər verir ki, bu barədə “Financial Times” (FT) qəzeti Enerji və İqlim Kəşfiyyatı Bölməsinin təhlilinə istinadən məlumat yayıb.

İtkilər milli qiymətlər əsasında hesablanıb. Məhsul itkisindən ən çox Fransa və Macarıstan əziyyət çəkib.

İstilik dalğaları Fransanın mərkəzi və cənubunda, Almaniyanın cənubunda, Avstriyada, Polşada və Macarıstanda buğda istehsalına təsir göstərib.

Qarğıdalı və buğdaya dəyən ziyana görə istehsal proqnozu təxminən doqquz milyon ton azalıb.

Fermerlər məhsuldarlıqda ciddi itkilərlə üzləşirlər və qıtlıq Ukrayna və Braziliya da daxil olmaqla idxala tələbatı artıra bilər. Müəlliflər belə bir nəticəyə gəliblər ki, Fransada daha az məhsul Şimali və Qərbi Afrikadakı alıcılara ixrac üçün mövcud olan buğda miqdarını da azalda bilər, yem qiymətlərinin artması isə yaxın aylarda heyvandarlıq istehsalçılarına təsir göstərə bilər.

ECIU-nun torpaq, qida və kənd təsərrüfatı üzrə analitiki Tom Lankaster bildirib:

"Bu, fermerlərin ciblərinə zərbə vuracaq, onların gəlirlərini azaldacaq və eyni zamanda Avropanın ərzaq təhlükəsizliyini sarsıdacaq".

Arktikada istiləşmə Avropada anormal istilik dalğalarının yaranmasına təsir göstərib. Bu hadisələr arasında əlaqəni Kamerino Universitetinin fiziki coğrafiya və iqlim riskləri üzrə professoru Massimiliano Fazzini müəyyən edib . Mütəxəssisin sözlərinə görə, Arktikada istiləşmə səbəbindən cənubdan gələn hava soyumağa vaxt tapmır və şimala nüfuz edir.

Müəllif: Tural