İyun istiləri Britaniya iqtisadiyyatına neçəyə başa gəlib? - Ağır günlər irəlidədir

Avropanı bürüyən rekord qıran iyun istiləri Böyük Britaniya iqtisadiyyatına təxminən 1,5 milyard dollara başa gəlib.

Publika.az xəbər verir ki, bu barədə “Bloomberg” agentliyinin təhlilində bildirilir.

Tədqiqatçıların fikrincə, 2026-cı ilin iyun ayı Avropada qeydə alınan ən isti ay olub. Həddindən artıq isti dalğasının təkcə İngiltərə və Uelsdə təxminən 2700 nəfərin ölümünə səbəb olduğu deyilir.

Yüksək temperatur məhsuldarlığa da təsir göstərib. 22 iyundan başlayan həftə ərzində Böyük Britaniya sakinləri orta hesabla adi haldan təxminən 30 dəqiqə az işləyiblər. İş saatlarında ən əhəmiyyətli azalma tikinti və kənd təsərrüfatı işçiləri də daxil olmaqla fiziki əməklə məşğul olanlar və ya daim istiliyə məruz qalanlar arasında qeydə alınıb. Bundan əlavə, tədqiqat iştirakçılarının 3,6%-i bu dövrdə ümumiyyətlə işə getməyib.

“World Weather Attribution” şirkətinin alimlərinin qeyd etdiyi kimi, rekord qıran yay istiliyinin iqtisadi təsiri uzun müddət hiss olunacaq. Onların məlumatlarına görə, son dərəcə yüksək temperatur torpaq nəminin buxarlanmasını sürətləndirir. 12 Avropa ölkəsindən olan tədqiqatçılar bunun quraqlıq ehtimalını 80 dəfə artırdığı qənaətinə gəliblər.

Mütəxəssislər hesab edirlər ki, məhsul çatışmazlığı, çaylarda və mühüm gəmiçilik yolları boyunca suyun səviyyəsinin aşağı düşməsi və istiliyin nüvə enerjisi də daxil olmaqla enerji istehsalına mənfi təsiri inflyasiyanı daha da sürətləndirə bilər.

Müəllif: Tural