Bu ölkədə fövqəladə vəziyyət - Türkiyə təyyarələr göndərdi

Türkiyə İspaniyanın meşə yanğınlarının söndürülməsində kömək edilməsi xahişinə cavab olaraq Krallığa iki təyyarə göndərib.

Publika.az xəbər verir ki, Ankara Madridin Avropa İttifaqının Mülki Müdafiə Mexanizmi vasitəsilə göndərilən çağırışını nəzərə alıb.

Türkiyənin İspaniyadakı səfirliyinin bəyanatında “dost və müttəfiq İspaniyaya bütün mümkün dəstəyin göstərilməsinə hazır olması” vurğulanıb. “Ankara təbii fəlakətlərlə mübarizədə beynəlxalq həmrəylik prinsipinə sadiqdir. İspaniyada yanğınların tez bir zamanda dayandırılmasına ümid edirik”, - deyə diplomatik nümayəndəlik vurğulayıb.

Buna cavab olaraq, Avropa Parlamentinin İspaniyadan olan üzvü Naço Sançes Amor təbii fəlakətlə mübarizədə göstərdiyi dəstəyə görə Türkiyə Prezidenti Rəcəb Tayyib Ərdoğana minnətdarlığını bildirib.

İspaniyanı bürüyən meşə yanğınları milli fəlakətə çevrilərək Madrid, Avila və Kastelyon şəhərlərini təhdid edib.

Güclü küləklər yanğınsöndürmə prosesinə mənfi təsir göstərir. Hakimiyyət orqanları 116 mindən çox insanı ölkənin təhlükəsiz bölgələrinə təxliyə edib.

Qeyd edək ki, son günlərdə Türkiyənin özündə də güclü meşə yanğınları qeydə alınıb, burada yanğınsöndürmə işləri bir neçə cənub və cənub-qərb əyalətini əhatə edib.