Serbiya gələcəkdə Aİ-yə qoşula bilməyəcək - Vuçiç səbəbini AÇIQLADI

Serbiya Prezidenti Aleksandar Vuçiç Belqradda Ukrayna Prezidenti Volodimir Zelenski ilə birgə mətbuat konfransında yaxın vaxtlarda ölkəsinin Avropa İttifaqına üzv olması üçün real imkan görmədiyini bildirib.

Publika.az xəbər verir ki, bu barədə "Yevropeyskaya pravda" nəşri məlumat yayıb.

Vuçiçin sözlərinə görə, o, Ukraynanın Aİ ilə qalan bütün danışıqlar klasterlərini mümkün qədər tez açmaq səylərini başa düşür, lakin hesab edir ki, Serbiya bir çox siyasi səbəblərdən hələlik birliyin üzvü ola bilməyəcək.

"Lakin mən, ilk növbədə Serbiya üçün - indi mən Ukraynadan danışmıram – yaxın gələcəkdə bir çox siyasi səbəblərdən Aİ üzvü olmaq imkanı görmürəm", – deyə Serbiya prezidenti bildirib.

Vuçiç qeyd edib ki, o, Ukraynanın, Moldovanın və digər ölkələrin Avropa İttifaqına qoşulmasını istəyir. Eyni zamanda, onun sözlərinə görə, Aİ-nin bütün dövlətlərinin birliyin bundan sonra da genişlənməsinə müsbət yanaşdığına dair əminlik yoxdur.

"Lakin mən düşünmürəm ki, bütün avropalıların ölkələrimizin Aİ-yə üzvlüyünə müsbət yanaşması birmənalıdır. Və mən həmişə bu barədə açıq danışıram. Bizim üçün onlar xorvatları, bolqarları, hollandları tapacaqlar, Ukrayna üçün isə başqasını tapacaqlar. Lakin mən hazırda bunu praktikada real olaraq həyata keçirmək imkanı görmürəm", – deyə Vuçiç bəyan edib.

Bununla yanaşı, o, əmin edib ki, Belqrad Ukraynanın avrointeqrasiyasına mane olmayacaq.

"Biz deməyəcəyik: "Əvvəlcə bizi götürün, Ukraynanı götürməyin". Ukrayna heç vaxt belə bir problemlə üzləşməyəcək, heç olmasa Serbiya kimi kiçik bir ölkə tərəfindən", – deyə prezident vurğulayıb.

Vuçiç həmçinin hesab edir ki, Aİ daxilində namizəd ölkələrin avrointeqrasiya prosesini sürətləndirmək üçün hazırda kifayət qədər güclü dəstək formalaşmayacaq.

Hüseyn İbadlı