Vuçiç NATO ilə müharibədən imtina etdi

Serbiya Prezidenti Aleksandr Vuçiç NATO ilə müharibədən imtina edib.

Publika.az xəbər verir ki, bu barədə TASS məlumat yayıb.

Onun sözlərinə görə, Serbiya Kosovoda serblərin təqib olunması səbəbindən alyansla münaqişədə iştirak etməyəcək. Vuçiç əlavə edib ki, Belqrad vətəndaşlarını dinc yollarla qorumağa çalışır.

Serbiya lideri qeyd edib ki, cavab addımı olaraq Belqrad Kosovonun ən böyük su elektrik stansiyasını su ilə təmin edən "Qazivode" su anbarını qidalandıran İbar çayının məcrasını dəyişdirə bilər.

Vuçiç bildirib ki, Serbiya tərəfi artıq bu məsələ ilə məşğul olan ekspertləri, eləcə də tikinti sektorunun nümayəndələrini, mühəndisləri və digər mütəxəssisləri dəvət edib.

"İbar çayının məcrasını dəyişdirmək üçün müxtəlif səbəblərimiz var, odur ki, albanların nə addım atacağını və özlərini necə aparacağını görəcəyik", — deyə Vuçiç əlavə edib.

Buna qədər Serbiya prezidenti bəyan etmişdi ki, Serbiyanı NATO-ya "dərhal" qəbul edə bilərdilər, lakin ölkəyə münaqişələr lazım deyil.

Hüseyn İbadlı