Ali Məhkəmənin keçmiş sədri PREZİDENT SEÇİLDİ

Macarıstan parlamenti Andraş Bakanı ölkə prezidenti seçib.

Publika.az xəbər verir ki, bu barədə qanunverici orqanın iclasının canlı yayımında məlumat verilib.

Qeyd olunub ki, gizli səsvermə zamanı Ali Məhkəmənin keçmiş sədrinin namizədliyini 140 deputat dəstəkləyib, altı nəfər əleyhinə çıxış edib, daha 53 nəfər isə səsvermədə iştirak etməyib. Seçilmək üçün 199 parlamentaridən üçdə iki səs tələb olunurdu. Yeni prezident avqustun 19-da vəzifəsinin icrasına başlayacaq.

Andraş Baka 2009–2011-ci illərdə Macarıstanın Ali Məhkəməsinə rəhbərlik edib. O, keçmiş baş nazir Viktor Orbanın təşəbbüsü ilə həyata keçirilən məhkəmə islahatı nəticəsində vəzifəsindən kənarlaşdırılıb. Sonradan Avropa İnsan Hüquqları Məhkəməsi bu qərarı qanunsuz hesab edib

Avqustun 8-də Macarıstanın Baş naziri Peter Madyar Bakanın hakim "Tisa" partiyasının prezident postunu tutmaq təklifini qəbul etdiyini bəyan edib. O qeyd edib ki, Ali Məhkəmənin keçmiş sədri xalqa xidmət etmək və macar xalqının birliyi naminə çalışmaq istəyini rəhbər tutaraq razılıq verib.

İyulda Orbanın dövründə təyin olunmuş prezident Tamaş Şuyok özünün vəzifədən kənarlaşdırılmasını nəzərdə tutan konstitusiya düzəlişini imzalayıb, bundan sonra xələfinin qeyri-legitim olacağını bəyan edib. Şuyok izah edib ki, o, konstitusiyanın pozulması ilə vəzifədən kənarlaşdırılır, buna görə də prezident institutu qanuniliyini itirir, lakin parlamentin formal olaraq qanuni prosedur çərçivəsində bəyəndiyi dəyişikliklərə qarşı çıxmaq səlahiyyətinin olmadığını etiraf edib.

Hüseyn İbadlı