34 illik problem: Reyn quruyur, hökumət isə çay yatağını dərinləşdirə bilmir

Almaniyada rekord quraqlıq ölkənin 34 ildir həll edə bilmədiyi problemi yenidən gündəmə gətirib. Reyn çayında suyun səviyyəsinin kəskin azalması gəmiçiliyi təhlükə altına salıb, bu isə sənaye və iqtisadiyyat üçün ciddi risk yaradır.

Publika.az xəbər verir ki, bu barədə “Financial Times” yazıb.

Məlumata görə, hələ 1992-ci ildə Helmut Kol hökuməti məşhur Loreley qayalıqları yaxınlığında su altında qalan qayaların götürüləcəyini vəd edib. Lakin layihə bu günədək reallaşmayıb.

Hazırda suyun səviyyəsinin kritik həddə enməsi səbəbindən gəmilər yüklərini tam götürə bilmir. Kaub ərazisində gəmiçilik kanalı digər hissələrdən 20 santimetr daha dayazdır. Avqustun 6-da burada suyun səviyyəsi tarixi minimuma - cəmi 19 santimetrə düşüb.

Almaniya Daxili Gəmiçilik Assosiasiyasının rəhbəri Yens Şvanen bildirib ki, altı qayalıq sahəsinin sökülməsinin bu qədər uzun çəkməsi anlaşılmazdır. Onun sözlərinə görə, mühəndislik işləri cəmi səkkiz ay ərzində görülə bilərdi.

Layihənin ləngiməsinə ekoloji etirazlar, hökumətlərin prioritetlərinin dəyişməsi və bürokratik əngəllər səbəb olub. Layihə 2019-cu ildə prioritet elan edilsə də, işlərin yalnız 2033-cü ildə başa çatdırılması planlaşdırılır.

Qeyd olunur ki, ötən həftə Reyn çayında suyun səviyyəsi 2018-ci ilin rekord göstəricisindən 50 faizdən çox aşağı düşüb. Nəqliyyat naziri Şteffen Bilger isə suyun səviyyəsinin aşağı qalması səbəbindən qarşıdakı həftələrin çətin keçəcəyini bildirib.

Müəllif: Adəm