Avropa

Makron "gözəl ölüm"ə imza atdı - Proses qanuniləşdirildi

19 Avqust 2026 16:35

Fransada evtanaziya rəsmən qanuniləşdirilib. Prezident Emmanuel Makron bu barədə qanunu imzalayıb.

Publika.az xəbər verir ki, bu barədə ölkənin rəsmi nəşri “Journal Officiel” məlumat yayıb.

Qanun layihəsi Fransa parlamenti tərəfindən iyul ayında təsdiqlənib. Avqustun 14-də isə Fransanın Konstitusiya Şurası sənədin ölkə Konstitusiyasına zidd olmadığını açıqlayıb.

Yeni qanuna əsasən, Fransada evtanaziya üçün müraciət etmək hüququ 18 yaşdan yuxarı şəxslərə, həmçinin ölkədə daimi və qanuni əsaslarla yaşayanlara veriləcək. Sənəddə evtanaziyaya hansı hallarda müraciət edilə biləcəyi də müəyyənləşdirilib.

Xatırladaq ki, evtanaziya sağalmaz xəstəlikdən əziyyət çəkən və dözülməz ağrılar keçirən bir insanın həyatına öz istəyi ilə tibbi yolla son qoyulması prosesidir. Bu söz yunan dilindən tərcümədə "gözəl ölüm" deməkdir.

Qeyd edək ki, evtanaziyanın qanuni olduğu ölkələr arasında Belçika, Lüksemburq, Niderland, Portuqaliya və İspaniya da var.

Müəllif: Adəm