“Hava qalxanı”, "dron divarı" - Avropanın 15 milyardlıq layihəsi

Avropa Komissiyası Aİ ölkələrinin SAFE fondundan istifadə etmədiyi vəsaitləri “Avropa hava qalxanı” və “Dron divarı” layihələrinə yönəltməyi nəzərdən keçirir.

Publika.az xəbər verir ki, “Euractiv”in məlumatına görə, Avropa Komissiyası bu layihələr üçün 15 milyard avroya qədər vəsait cəlb etməyi planlaşdırır.

“Avropa hava qalxanı” Avropa ölkələrinin inteqrasiya olunmuş hava hücumundan və raketdən müdafiə sisteminin yaradılmasını nəzərdə tutur. “Dron divarı” isə ilk növbədə Aİ-nin şərq sərhədləri boyunca pilotsuz uçuş aparatlarının aşkarlanması, izlənməsi və zərərsizləşdirilməsinə yönələcək.

Aİ-nin 150 milyard avroluq SAFE fondu 2030-cu ilə qədər Avropanın müdafiə potensialının gücləndirilməsi proqramı çərçivəsində hərbi satınalmalara güzəştli kreditlərin verilməsi üçün yaradılıb. Fondun vəsaitlərinin bir hissəsi hələ mənimsənilmədiyindən, Avropa Komissiyası qalan məbləği prioritet müdafiə layihələrinə yönəltmək niyyətindədir.

Vəsaitlərin bölgüsü ilə bağlı yekun qərar Aİ-yə üzv dövlətlərlə razılaşdırıldıqdan sonra veriləcək.

Müəllif: Adəm