Fransada ağcaqanadlarla bağlı fərman imzalandı: Məhkəmə ilə hədələdilər

Fransanın Sen - Jyust-Sen-Ramber kommunası pələng ağcaqanadlarının yayılmasına diqqət çəkmək üçün qeyri-adi bir yol seçib.

Publika.az BFMTV-yə istinadla xəbər verir ki, mer Olivye Joli həşəratların kommunanın üzərindən uçmasını rəsmi olaraq qadağan edib və "qayda pozanları" məhkəməyə verməklə hədələyib.

Sənəddə bildirilir ki, alçaq hündürlükdə, dairəvi hərəkət edən ağcaqanadlar, eləcə də onların dişləmələri əhali arasında qıcıqlanmaya və "həddindən artıq narazılığa" səbəb olur. Buna görə də, qadağanı pozan hər hansı bir pələng ağcaqanad "məsuliyyətə cəlb olunmalıdır".

Lakin işlər hələ real sanksiyalar nöqtəsinə çatmayıb.

"Hazırda bir dənə də olsun ağcaqanad saxlanılmayıb və ya cərimə edilməyib", - deyə Joli bildirib.

Fərmanın istehzalı forması çox ciddi bir problemlə bağlıdır. Merin sözlərinə görə, yay tətilindən sonra sakinlər ağcaqanadlardan kütləvi şəkildə şikayət etməyə başlayıblar və bu da açıq havada vaxt keçirməyi çətinləşdirib.

"Bu, həm ciddi, həm də yüngül bir mövzudur, amma bu cür xırda şeylər həyatımızı zəhərləyə bilər", - deyə mer əlavə edib.

Bələdiyyənin qərarı həşəratları cəzalandırmaqdan daha çox, sakinlərin diqqətini onlarla mübarizə aparmaq səylərinə cəlb etmək məqsədi daşıyır. Hakimiyyət orqanları sakinlərə vedrələrdə, gül qablarında və ya köhnə təkərlərdə durğun su qoymamağı, novları və kanalları müntəzəm olaraq təmizləməyi, hovuzları örtməyi və ya təmizləməyi tövsiyə edib.

Bələdiyyə orqanları sadəcə müraciətlərlə kifayətlənməyib. Ağcaqanadlarla mübarizə üçün 45.000 avro ayrılıb. Şəhər xüsusi tələlər, yarasa yuvaları, eləcə də həşəratların təbii düşmənləri olan qaranquşları cəlb etmək üçün tikililər quraşdırır.

Tropik və subtropik bölgələrə məxsus olan pələng ağcaqanadları ilk dəfə 2004-cü ildə Fransada görünüb. O vaxtdan bəri onlar ölkə daxilində yayılmağa davam ediblər.

Müəllif: Tural