2 milyon avroluq şantaj: Berlin administrasiyasının məlumatları yayıldı

“Rhysida” haker qrupu Berlin əyalət administrasiyasına qarşı həyata keçirdiyi kiberhücum zamanı oğurladığı məlumatları internetdə yayıb. Buna səbəb isə qrupun tələb etdiyi təxminən 2 milyon avro məbləğində fidyəni ala bilməməsi olub.

Publika.az “Spiegel”ə istinadən xəbər verir ki, hakerlər “Darknet”də təxminən 5,8 terabayt həcmində məlumat yerləşdirib. Yayılan məlumatlar arasında 1,4 milyondan çox fayl ictimaiyyət üçün əlçatan olub.

“Rhysida” Berlin Senatından 30 bitkoin, yəni təxminən 2 milyon avro tələb edib və bunun ödənilməsi üçün son tarix müəyyənləşdirib. Berlin Senatı isə bu cür şantaja boyun əyməyəcəyini açıqlayıb. Ultimatum sentyabrın 4-də saat 15:35-də başa çatdıqdan az sonra hakerlər oğurladıqları məlumatları yayımlayıblar.

Açıq yayılan məlumatların tərkibində təxminən 80 min inzibati xəta işi, 46,5 mindən çox müqavilə, kritik infrastruktur obyektləri barədə məlumatlar, məhkəmə sənədləri, fövqəladə hallar planları, parollar və 6 minə yaxın giriş məlumatının olduğu bildirilir.

Almaniyanın İnformasiya Təhlükəsizliyi üzrə Federal İdarəsi hücumun maliyyə qazancı əldə etmək məqsədi daşıyan kibercinayətkarlar tərəfindən həyata keçirildiyini açıqlayıb. Qurum hücumun dövlət və ya siyasi motivli qruplarla əlaqəsinə dair hər hansı sübut müəyyən etməyib.

Mütəxəssislər Berlin Senatının fidyə ödəməmək qərarını düzgün hesab edirlər. Onların fikrincə, kibercinayətkarlara ödəniş edilməsi bu cür hücumların davam etdirilməsini təşviq edə bilər.