Hörmüzə görə Avropa İttifaqının itirdiyi məbləğ bəlli oldu

Avropa İttifaqı İranla bağlı münaqişə və Hörmüz boğazındakı vəziyyət səbəbindən 90 milyard avro itirib.

Publika.az xəbər verir ki, bu barədə Avropa Komissiyasının prezidenti Ursula fon der Lyeyen Avropa Parlamentindəki çıxışı zamanı bildirib.

Onun sözlərinə görə, münaqişənin başlanğıcından bəri Aİ 90 milyard avro dəyərində qazıntı yanacaq idxalına əlavə xərc çəkib. Lakin alınan enerjinin həcmi artmayıb.

Fon der Lyeyen bərpa olunan enerji mənbələri, nüvə enerjisi, biometan və digər texnologiyalar da daxil olmaqla, daxili enerjinin inkişafını sürətləndirməyə çağırıb.

O, Avropanın elektrikləşdirilməsini əsas məqsədlərdən biri kimi müəyyən edib.

Aİ 2040-cı ilə qədər enerji istehlakında elektrik enerjisinin payını ikiqat artırmağı planlaşdırır. Avropa Komissiyası rəhbərinin sözlərinə görə, bu, qazıntı yanacaq idxal xərclərini ildə 260 milyard avro azaldacaq.

İranla bağlı münaqişə qlobal neft və mayeləşdirilmiş təbii qaz ticarətinin əsas marşrutu olan Hörmüz boğazında gərginliyin artmasına səbəb olub. Bölgədə gəmiçilikdə yaranan fasilələr və risklər enerji qiymətlərinə və onlardan asılı olan ölkələrin xərclərinə təsir göstərir.

Müəllif: Tural