Yunanıstandan Almaniyaya tarixi iddia - 341 milyard avro...

Yunanıstan Almaniyanın İkinci Dünya müharibəsi illərində vurduğu zərərə görə kompensasiya ödəməsində təkrarən təkid edir.

Publika.az xəbər verir ki, bu barədə DPA məlumat yayıb.

Bildirilib ki, ölkə prezidenti Konstantinos Tassulas Lingiades kəndində keçirilən anım mərasimində bu barədə bəyanat verib.

Tədbir yerli sakinlərin alman işğalçı qoşunları tərəfindən kütləvi şəkildə qətlə yetirilməsinin ildönümünə həsr olunub. Bildirilib ki, 1943-cü ildə orada 88 nəfər, o cümlədən 40-dan çox uşaq və yeniyetmə həlak olub. Tassulas vurğulayıb ki, Afina öz tələblərini əsaslı hesab edir və onların qüvvədən düşmədiyini düşünür.

Yunanıstan tərəfi iddiaların məbləğini 278–341 milyard avro həcmində qiymətləndirir. Hesablamalara hərbi zərərə görə kompensasiya və işğal zamanı Almaniyaya verilmiş məcburi borcun qaytarılması daxildir. Berlin tələbləri rədd edir və məsələnin hüquqi nöqteyi-nəzərdən nizamlandığını bəyan edir.

Daha əvvəl Polşanın keçmiş baş naziri Mateuş Moravetski də Almaniyadan müharibə zamanı vurulmuş zərərə görə təzminat tələb etməyə çağırmışdı.

Hüseyn İbadlı