Romada etirazçılar Kolizeyə girdilər

Romada gənclərin etiraz aksiyasının iştirakçıları Kolizeyə daxil olublar.

Publika.az xəbər verir ki, bu barədə "RİA Novosti" məlumat yayıb.

Bildirilib ki, minlərlə insandan ibarət izdihamdan ayrılan bir neçə yüz radikal Kolizeyin içərisinə daxil olub. Təxminən 10 dəqiqə sonra asayişi bərpa etmək üçün xüsusi geyimdə olan polis əməkdaşları hadisə yerinə gəliblər. Daha 15 dəqiqə sonra nümayişçilər ərazini tərk ediblər və bundan sonra Kolizeyə aparan darvazaları bağlamaq mümkün olub.

Etiraz iştirakçılarının bir qismi üzlərini balaklavalarla gizlədir. Vəziyyət gərgin olaraq qalır, lakin polislə nümayişçilər arasında toqquşma baş verməyib.

“Il Messaggero” qəzetinin məlumatına görə, oktyabrın 24-də Romada elan edilmiş nümayişlərlə əlaqədar hakimiyyət orqanları ictimai asayişin qorunması tədbirlərini gücləndiriblər. Şəhərin mərkəzi rayonlarına nəzarət etmək üçün 1500-dən çox hüquq-mühafizə orqanı əməkdaşı cəlb olunub, etirazçılar isə havadan pilotsuz uçuş aparatları vasitəsilə izlənilir. Şənbə günü ümumilikdə dörd etiraz aksiyasının keçirilməsi gözlənilirdi.

Hüseyn İbadlı