Vyetnamda yaşayan “tarzanlar”dan biri öldü - FOTOLAR

Bir qədər öncə Vyetnamın cəngəlliklərində tapılmış, uzun illər vəhşi heyvanlarla birgə yaşamış müasir "tarzan"lardan biri normal həyata müdaxilə edə bilmədiyindən dünyasını dəyişib.

Publika.az xarici mətbuata istinadən xəbər verir ki, bu ölkənin insan ayağı dəyməyən yerlərindən birində aşkar olunmuş, onilliklərlə cəngəllikdə yaşamış ailə üzvlərindən biri vəfat edib.

Qeyd edək ki, ölkənin yaşayış məskənlərindən birindən 40 kilometr kənardakı cəngəllikdə aşkarlanmış 82 yaşlı Xo Van Txan və onun 42 yaşlı oğlu Xo Van Lanqın görüntüləri hər kəsi dəhşətə salmışdı. Onlar uzun illər ibtidai həyat tərzi keçirmiş, meyvələrlə, müxtəlif bitkilərlə qidalanmışdılar.

Lakin əldən düşmüş qoca gəzmək qabliyyətini itirmişdi. Buna görə də onu meşədən xərək vasitəsilə çıxarmışdılar.

Onlar cəngəllikdə 1971-ci ildə, müharibə vaxtı məskən salmışdılar. Xo Van Txan arvadı və 4 uşağı ilə qaçaraq meşədə gizlənmişdi. Lakin meşəyə düşən bombalar onun ailə üzvlərindən bir neçəsini məhv etmişdi. Xo Van Txan bu illər ərzində doğma dilini unutmuşdu. Onun oğlu isə ümumiyyətlə danışa bilmirdi.

Ailənin xilas olunmuş kiçik oğlu Xo Van Tri isə 20 ildən artıq atasını və qardaşlarını axtarmalı oldu. 82 yaşlı Xo Van Txan və onun 42 yaşlı oğlu Xo Van Lanqınin yaşadıqları yer bir qədər öncə aşkar edilib. Onlar ağaclardan hazırlanmış "ev"də gizlənmişdilər.

Anar