Prokuror keçmiş diplomata cəza istədi

Bakının Nizami rayonunda bir nəfəri bıçaqlamaqda ittiham olunan keçmiş diplomat Emin Şaiq oğlu İbrahimovun cinayət işi üzrə məhkəmə prosesi keçirilib.

Publika.az Teleqraf-a istinadən xəbər verir ki, Bakı Ağır Cinayətlər Məhkəməsində hakim Vüqar Quliyevin sədrliyi ilə keçirilən iclasda məhkəmə istintaqının başa çatdığı elan olunub və çıxış üçün dövlət ittihamçısına söz verilib.

İttiham nitqi ilə çıxış edən dövlət ittihamçısı Emin İbrahimovun 10 il müddətinə azadlıqdan mərhum edilməsini təklif edib. Onun cəzasının ümumi rejimli cəzaçəkmə müəssisəsində çəkməsinin müəyyən edilməsini istəyib.

Daha sonra təqsirləndirilən şəxsin vəkili çıxış etmək üçün vaxt istəyib. Onun istəyi nəzərə alınıb.

Növbəti proses aprelin 11-də davam edəcək.

İttihama görə, hadisə 2024-cü ildə Nizami rayonu, Məmmədov küçəsində baş verib. Emin İbrahimov səki ilə hərəkətdə olan zaman onunla üzbəüz gələn 38 yaşlı Kamal Şükürovla çiyin-çiyinə toxunub. Bu səbəbdən onlar mübahisə ediblər. Onların arasında dartışma zamanı Emin özündə olan bıçaqla Kamalın qarın nahiyəsindən bir dəfə vurub.

Dövlət ittihamçısı qeyd edib ki, istintaq orqanı tərəfindən Emin İbrahimovun barəsində Cinayət Məcəlləsinin 126.2.4 (ümumi təhlükəli üsulla, xuliqanlıq niyyətilə qəsdən sağlamlığa ağır zərər vurma) və 221.3-cü (silahdan və ya silah qismində istifadə olunan əşyalardan istifadə edilməklə törədilməsi zərər çəkmiş şəxsə zor tətbiq olunması ilə, yaxud özgənin əmlakının məhv edilməsi və ya zədələnməsi ilə müşayiət olunan xuliqanlıq hərəkətləri törətmək) maddələri ilə ittiham elan edilib.
Qeyd edək ki, Emin İbrahimov 2007-2020-ci illərdə diplomatik xidmətdə olub. O, 2012-2016-cı illərdə Azərbaycanın ABŞ-dəki səfirliyində, 2016-2019-cu illərdə isə Azərbaycanın Uruqvaydakı diplomatik nümayəndəliyində işləyib.