Vəhşi, amansız cinayətkar: Eskobarın ortağı azadlığa buraxıldı - FOTO

Kolumbiyada hakim 75 yaşlı cinayətkarın narkotik alveri ilə bağlı cəzasının başa çatdığına qərar verdikdən sonra Kolumbiya hakimiyyəti Medellin kartelinin keçmiş rəhbəri Karlos Lexderi azad edib.

Publika.az xəbər verir ki, bu barədə "CBS News" məlumat yayıb.

"Kokain kovboylarından" biri və Pablo Eskobarın ortağı olan Lexder ABŞ-a ekstradisiya edilən ilk kolumbiyalı narkotik alverçisi olub.

Keçmiş narkotik alverçisi 1987-ci ildə ABŞ-a ekstradisiya edilib və orada 30 ildən çox həbsxanada yatıb. 2020-ci ildə Lexder ABŞ-da cəzasının üçdə ikisini çəkdikdən sonra azadlığa buraxılıb. O, həm də vətəndaşı olduğu Almaniyaya deportasiya edilib.

Vəkil bildirib ki, o, xərçəngdən sağalır və yüksək təzyiqdən əziyyət çəkir.

Bildirilir ki, Kolumbiya hakimiyyəti Lexderi 1995-ci ildə ABŞ həbsxanasında başqa bir ittihamla cəza çəkən zaman narkotik alverində günahlandırıb. Kartel lideri Kolumbiyada 24 il həbs cəzasına məhkum edilib, yəni Kolumbiya qanunlarına görə onun cəza müddəti 2019-cu ildə bitəcəkdi.

1920-ci illərdə Kolumbiyaya gələn alman mühacirin oğlu olan Lexder kriminal karyerasına 1970-ci illərdə Nyu-Yorkda qohumlarının evində yaşayarkən başlayıb.

Qeyd olunur ki, əlaqələrindən və ingilis dili biliyindən istifadə edərək Medellin Karteli üçün kokain bazarları açıb və onun rəhbəri Eskobarın əsas müttəfiqinə çevrilib. "Netflix-in Narcos" serialında o, Baham adalarında "Norman's Cay" adlı xüsusi adada kokain daşınması üçün əsas səhnəyə çevrilmiş kokain tranzit mərkəzini idarə edən vəhşi, amansız cinayətkar kimi təsvir edilir.

O, Kolumbiyada Posada Alemana adlı dəbdəbəli kənd otelinə sahib idi. Onun ərazisindəki qəfəslərdə aslanlar və Lexderin sevimli musiqiçisi Con Lennonun böyük heykəli var idi.

Vurğulanır ki, Lexder ABŞ-da əvvəlcə ömürlük həbs cəzasına məhkum edilib, lakin o, amerikalı müstəntiqlərə Vanama lideri Manuel Norieqanın mühakimə olunması üçün istifadə olunan məlumatları təqdim etməklə cəzasını azalda bilib.

Adəm